Qurmanǵazy Saǵyrbaıuly Bókeı ordasy, Beketaı qumynyń Jıdeli degen jerinde dúnıege kelgen. Ol meken qazir Atyraý oblysy, Qurmanǵazy aýdany atalady. Uly kúıshi bul kúnderi Reseıdegi Astrahan oblysynyń Volodar aýdanyndaǵy «Altynjar» degen jerde máńgilik uıqyda jatyr. Biraq qaı jerde de kúı atasyna degen qurmette shek joq. Kúı atasynyń beınesin mańǵystaýlyq aqıyq aqyn, júırik jyraý Qashaǵan Kúrjimanulynyń 170 jyldyǵynda ásem Aqtaýdaǵy ortalyq alańǵa qatarlastyra ornalastyrýdyń da máni bar. Qurmanǵazy Ordanyń túrmesinen qashyp shyǵyp Jaıyqty jaǵalap, Jem, Saǵyz ózenderinen ótip, Mańǵystaý men Ústirtti bes jyldaı aralaıdy. Aqyn Qashaǵanmen kezdesedi. Eki alyp qatar júrip, aýyl-eldi aralap, halyqqa rýhanı qýat beredi. Mańǵystaý saparynda Qurmanǵazynyń áıgili «Tóremurat», «Aqsaq kıik», «Balqaımaq», «Adaı» kúıleri ómirge keledi. Eki alyptyń órshil óneri men dostyǵyn halqymyzdyń qulager aqyny Ilııas Jansúgirov:
Atyraý – alys bizge jerdiń túbi,
Qashaǵan – júırik jyraý, eldiń tili,
Shashqanda kúıden kóbik Qurmanǵazy
Qashaǵan jyrdan tókken marjan dúrdi, – dep jyrǵa qosqan emes pe?!
Mine, endi Aqtaýda oblys, qala basshylarynyń bastaýymen, aımaq azamattarynyń qostaýymen kúı atasynyń eńseli eskertkishi boı kóterdi. Bıiktigi bes metr bolatyn mármár tastyń ústindegi Qurmanǵazynyń beınesin somdaǵan mańǵystaýlyq talantty músinshi Kósher Baıǵazyuly. Saltanatty sátte oblys ákimi Qyrymbek Kósherbaev, Qazaqstannyń halyq jazýshysy, Eńbek Eri Ábish Kekilbaıuly álemdik mýzyka mádenıetine ólsheýsiz úles qosqan uly babamyz týraly tereńnen tolǵaı áserli áńgimeledi.
Aıtystyń aqtańgeri Mels Qosymbaev jyrdan shashý shashyp, oblystyń ár aımaǵynan kelgen ónerli jastar merekelik konsert kórsetti.
Jolaman BOShALAQ.