Ońtústik Qazaqstan oblysynyń ákimi Janseıit Túımebaevtyń tapsyrmasymen qala ortalyǵynyń ınvestısııalyq tartymdylyǵyn arttyrý jáne turǵyndar men qonaqtarǵa qolaıly ómir súrýge jaǵdaı jasaý, sanıtarlyq ahýalyn jaqsartý basty nazarǵa alynǵan bolatyn. Atalǵan tapsyrmalardyń oryndalý barysy oblys ákimdiginde ótken jıynda taǵy bir pysyqtalyp, tıisti sala basshylaryna naqty tapsyrmalar júkteldi.
Oblys basshysynyń Shymkent qalasynyń ári qaraı damýyn qamtamasyz etý boıynsha bergen tapsyrmalarynyń oryndalý barysy jóninde oblystyq Energetıka jáne turǵyn úı-kommýnaldyq sharýashylyq basqarmasy basshysy Marǵulan Maraıym baıandady.
Aıta keteıik, búginde Shymkent qalasynda kópqabatty turǵyn úı qoryn kútip ustaý, úı turǵyndaryna qolaıly jaǵdaılar jasaý ózekti máselelerdiń biri. Shymqaladaǵy kópqabatty turǵyn úılerdiń basym kópshiligi 1930-1990 jyldar aralyǵynda paıdalanýǵa tapsyrylýyna baılanysty olardyń tozý deńgeıi joǵary bolyp otyr. Basqarma basshysy kópqabatty úılerdi kondomınıým retinde tirkeý, basqarý organyn qurý, kútip ustaý, saqtaý jaǵdaıyn sóz etti.
«О́ńirlerdi damytýdyń 2020 jylǵa deıingi baǵdarlamasy aıasynda Shymkent qalasynda bıyl 67 kópqabatty turǵyn úıdi kúrdeli jóndeýden ótkizý josparlanýda. Qala ákimdigi tarapynan 21 úıdiń jobalaý smetalyq qujattamasy daıyndalyp, oblystyq bıýdjetten 229,6 mln. teńge qarastyryldy», - dedi Marǵulan Maraıym.
Basqarma basshysy Shymkent qalasy boıynsha 1992 kópqabatty turǵyn úıdiń 293-in ádilet organdaryna tirkeýdi qadaǵalap, uıymdastyrý jumystaryn basshylyqqa alýdy usyndy.
«Kópqabatty turǵyn úılerdi kútip ustaý maqsatynda páter ıeleriniń kelisimimen kondomınıým obektisiniń basqarý organy nemese páter ıeleriniń kooperatıvteri qurylýy qajet. Búgingi kúnge 1120 úıge 17 basqarýshy kompanııalar qyzmet kórsetýde. Bul áli de az. Sondyqtan osy saladaǵy jumystardy jandandyrý kerek. Sondaı-aq qalanyń qysqy jylytý maýsymyna daıarlyǵyna ázirden bastap kiriske abzal», - dedi oblys ákimi J. Túımebaev.
Jıyn barysynda turǵyn úı, sanıtarlyq tazalyq, kóriktendirý, tabıǵı gaz paıdalaný, sapaly elektr energııasy, aýyz sý, kanalızasııa, jylýmen qamtamasyz etýdegi jumystardyń barysy da nazardan tys qalǵan joq. Turǵyn úılerdi kútip ustaý úshin servıstik jáne basqarý kompanııalaryn qurý jaıy da sóz boldy. Jyl basynda qalada bar joǵy 9 servıstik kompanııalar bolsa, búgingi kúnge olardyń sany 17 jetip, 1120 kópqabatty turǵyn úılerdi qamtyp otyr.