«Arnaıy synyptar ashý – bizdiń stıl emes. Biz oqshaýlana beretin bolsaq, onda jaǵdaıdy odan ári qıyndatatyn bolamyz. Eger qoǵam múgedek adamdar týraly pikirin ózgertetin bolsa, onda bizde damyǵan basqa elderden kem emes júıe qalyptasady. Eń jaqyn dosym meni ózimen teń dárejede kóredi. Basqalar da sondaı bolǵanyn qalaımyn.
Meni Nazarbaev ýnıversıtetinen basqa birde-bir joǵary oqý orny oqýǵa qabyldamaıtyndyǵyn jaqsy bilemin. Sondyqtan da men «Indıgo» atty mańyzdy jobany jasap jatyrmyn. Qazir jas pedagogıka mamandary arasynda irikteý júrgizilýde, keıin olar tıýtor bolyp jumys isteıdi», dedi I.Mýstopýlo. Mundaǵy tıýtor – aǵylshyn sózi, aýdarǵanda tálimger degen maǵynany beredi eken. Bul – erekshe pedagogıkalyq laýazym.
«Tıýtor – pedagogıkalyq bilimi bar ózin-ózi oqytqan adamdar. Bizde semınarlar, trenıngter bolady. Tıýtor úıge kelip kómek kórsetpeıdi, ol balaǵa túsiniksiz bolǵan kezde ǵana kómekke shaqyrylady. Sóıtip, ol balalardyń ózin damytyp, qoǵamǵa beıimdelýine atsalysady. Men osy jobanyń júzege asýyna bar kúshimdi salamyn», deıdi jas fızık. Daryndy jetkinshek áńgimesiniń arasynda Kembrıdj ýnıversıtetiniń professory, aǵylshynnyń ataqty ǵalymy Stıven Hokıngpen kúzde kezdesetindigi jaıynda aıtty.
Sal aýrýyna shaldyqqan Isaak Taraz qalasyndaǵy №13 mektepte bilim alady. Biraq, syrqatyna qaramastan, 2015 jyly oqýshylar arasyndaǵy ulttyq ınnovasııalar konkýrsynyń arnaıy syılyǵyna ıe bolǵan. Sodan beri Isaakty Qazaqstannyń túkpir-túkpiri, tipti sheneýnikter de tanyp, bile bastady. Sol kezde Investısııalar jáne damý mınıstrligin basqarǵan Áset Isekeshev Isaakpen tanysyp, onymen túsken sýretin búkil áleýmettik jelige taratqan bolatyn.
Ashat Raıqul,
"Egemen Qazaqstan"
Sýretti túsirgen Orynbaı Balmurat,
"Egemen Qazaqstan"