MJS mehanızmi boıynsha júzege asyrylatyn jobanyń paıdasy - jobany jeke seriktes qarjylandyratyndyqtan təýekel memleket pen bıznestiń arasynda teń bólinedi, bıýdjetke salmaq azaıady. Dəstúrli memlekettik satyp alýlarmen salystyrǵanda MJS modelin qoldaný kezinde qurylys sapasy joǵary bolady, óıtkeni jobany ary qaraı paıdalanýǵa jeke seriktes jaýap beredi. Taǵy bir artyqshylyǵy - jeke seriktestiń paıdasy usynǵan qyzmetiniń sapasyna tikeleı baılanysty bolady.
-Tikeleı kelissózder aıasynda jeke seriktes qajetti jobalyq qujattardyń bərin ózi daıyndaıdy. Biraq atalǵan prosestiń qıyndyǵyna oraı qujat daıyndaý úshin "Qazaqstandyq memlekettik-jekemenshik seriktestik ortalyǵy" AQ keńes berýshi retinde tartyldy",- deıdi atalǵan ortalyqtyń sarapshysy Shynasyl Ernazar.
Qazaqstanda jeke kompanııa kóshe jaryqtandyrý qurylysy men paıdalaný isin alǵash ret qolǵa alyp otyr. "Batys tranzıt" AQ kompanııasynda memlekettik-jekemenshik seriktestiktiń sətti júzege asqan təjirıbesi bar. 2005 jyly mekeme Soltústik Qazaqstan men Aqtóbe oblystarynyń arasynda aımaqtyq elektr berý jelisiniń qurylysyna qatysqan. Endi memlekettik-jekemenshik seriktestik qaǵıdasymen əleýmettik baǵyttaǵy jobalarda jumysyn jalǵastyrýdy kózdep otyr.
-MJS jobasyn júzege asyrý sheńberinde qalanyń 39 kóshesin jaryqtandyrý úshin jaryqdıodty qosólshemdi shamy bar jańa tirek qurylysy josparlanyp otyr. Jeke seriktestiń qatysy qarjylandyrýdyń 100 paıyzyn quraıdy jəne atalǵan jelini qurylys bitkennen keıin 6 jyl paıdalanady"- deıdi Atyraý oblystyq energetıka jəne turǵyn úı-kommýnaldyq sharýashylyq basqarmasynyń basshysy Jumabaı Qaraǵaev. Joba azamattarǵa qolaıly orta qalyptastyryp, jańa tehnologııalardy engizýge, qylmysty azaıtyp, jol qozǵalysy qaýipsizdigin arttyrýǵa septigin tıgizedi.
Bul bastama qala turǵyndaryna, bıznes pen memleketke birdeı paıdaly. Jeke seriktes "Batys tranzıt" AQ MJS aıasynda qoldaý alady. Kompanııaǵa kóshe jaryqtandyrý jelisiniń qurylysy úshin ýaqytsha qaıtarymsyz qoldanýǵa jer telimderi beriledi, sonymen qatar MJS nysanyn basqarýǵa ınvestısııalyq, operasııalyq shyǵyndarǵa ótemaqy men syıaqy tólenedi.
Baqytgúl Babash,
"Egemen Qazaqstan"