Bıyl Qaraǵandy oblystyq tarıhı-ólketaný murajaıyna seksen bes jyl. Búginde qundy qujattar men biregeı eksponattardyń taptyrmas oshaǵyna aınalǵan murajaıdyń ekspozısııasy 1800 sharshy metrdi quraıtyn 14 zaldan turady. Tarıhı jádigerler jınaqtalǵan orynǵa tanymymyzdy tereńdetip jıi bas suǵyp turamyz.
Jýyrda taǵy bir tamasha qujatty qolymyzǵa ustap kórdik. Otyz bir betten turatyn qundy kitapsha – 1906 jyly Qazan qalasyndaǵy «Bratıa Karımovy» baspahana úıinde qattalǵan eken. Shejireni «Qaraǵandy qaıyrymdylyq mekemesi» medresesiniń tóraǵasy Mehmed Bılgın oqyp aýdarǵan. Aýdarmadan uqqanymyzdaı, onda Shyńǵys hannyń babalarynyń shejiresi baıandalǵan. Jalpy, kitap – «Shyńǵystyqtardyń shejiresi» dep esimdelgen. Taptyrmas tarıhı qujat buǵan deıin Balqash qalasynda saqtalyp kelgen. Atalmysh murajaıǵa 2011 jyly Ahat Súleımenov esimdi azamat ótkizipti. Qazirde baǵa jetpes baı mura mýzeıdiń «Jádigerler ápsanasy» dep atalatyn bóliginde tur.
Mıras ASAN, «Egemen Qazaqstan» Qaraǵandy oblysy