Is-shara kezinde kóliktik-logıstıkalyq áleýetti arttyrý, Kaspıı tranzıttik dálizindegi biryńǵaı tarıf jáne ózara tıimdi yntymaqtastyq jaıy sóz boldy. Máseleni talqylaýǵa halyqaralyq teńiz jobalarynyń iri ınvestorlary – teńiz logıstıkasy belsendi damyǵan elder: Reseı, Ázirbaıjan, Túrkııa, Qytaı, Grýzııa, Amerıka, Ulybrıtanııa, Italııa porttarynyń ókilderi, sondaı-aq, memlekettik organdardyń, jergilikti iri munaı kompanııasynyń jetekshileri qatysty.
– Mańǵystaý oblysynyń ınvestısııalyq jáne kóliktik-logıstıkalyq áleýetin odan ári damytýǵa arnalǵan halyqaralyq forýmǵa qosh keldińizder! О́zderińizge belgili, bizdiń oblysymyz Kaspıı jaǵalaýyndaǵy birden bir aımaq retinde Uly Jibek jolyn qaıta jańǵyrtý baǵdarlamasynda sheshýshi mańyzǵa ıe. Munyń dálelin ózderińiz Qazaqstannyń teńiz qaqpasy – Aqtaý, Quryq porttarynda bolǵanda kórdińizder, – dedi jıynda aımaq basshysy Eraly Luqpanuly.
Kaspıı jaǵalaýy elderimen odan ári belsendi yntymaqtasýǵa Mańǵystaýda barlyq jaǵdaı jasalǵan. Aıtalyq, elimizdiń tranzıttik áleýetin damytý úshin bıyl Quryq porty qurylysynyń ekinshi kezeńi-avtomobıl ótkelin salý bastaldy. Joba balamaly marshrýttar boıynsha avtomobıl tasymalyn damytýda báskelestik ahýal qalyptastyrady.
Mýltımodaldy logıstıkalyq tizbekti damytý maqsatynda zaman talabyna saı qurǵaq júk jáne parom floty jasaqtalýda. 2020 jylǵa deıin flottaǵy kemeler sany 20-ǵa jetedi.
Forým aıasynda Mańǵystaý oblysy ákimdigimen jáne «A+A Group of Companies», «EnerMech» kompanııalary arasynda úshjaqty memorandýmǵa, Aqtaý jáne Anaklııa porttary arasynda ekijaqty memorandýmǵa qol qoıyldy. Memorandýmdar energetıka, kólik jáne logıstıka salalaryna ınvestısııa tartý jáne ózara yntymaqtastyq maqsatynda jasaqtaldy.
Gúlaıym Shyntemirqyzy, «Egemen Qazaqstan» Mańǵystaý oblysy