...«Qandy 37» kitabynyń tusaýkeseri ótti
Qarlag qasireti aqıqatyn ashýda kóp jyldan beri qalam terbep júrgen tanymal jýrnalıst Ekaterına Kýznesovanyń bul kólemdi eńbegine 12 ocherk engen. «Nur Otan» HDP oblystyq fılıalynyń máslıhat zalynda ótken kezdesýde avtor kitaptyń jazylý tarıhyn baıan etti.
Atalǵan týyndynyń bir ereksheligi – atý jazasyna kesilip, qaza tapqan turǵylyqty halyq ókilderiniń tolyq tizimi berilgen. Tusaýkeserde sóz sóılegen О́rikbaı Káribozov atasy Káriboz Shektibaevtyń 1930-1932 jyldary Qaraǵandy qalalyq keńesiniń birinshi tóraǵasy bolǵanyn, Soltústik Qazaqstanda jaýapty qyzmette júrgende qýǵyn-súrginge ushyraǵanyn atalǵan kitaptan oqyp bilgenin aıtyp, qalamgerge rızashylyǵyn bildirdi.
Aıqyn NESIPBAI, Qaraǵandy.
...Festıval bastaldy
Ekibastuzdyń qala jáne aýyldyq aýmaqtarynyń shyǵarmashylyq jáne kórkemónerpazdar ujymdary jurtshylyqty el Táýelsizdiginiń 20 jyldyǵyna arnalǵan án merekesine shaqyrdy. Ár aýyldan kelgen ánshiler toby týǵan jer, dostyq jaıly halyq ánderin shyrqady. Al, qalalyq óner ujymdary ártúrli tilderdegi ánderdi oryndady. Qalalyqtarǵa jaqsy tanys «Djýmandjı», «Ocharovanıe» bı ansamblderi de óner kórsetti.
Festıval aıasynda halyq sheberleriniń sándik-qoldanbaly óner kórmesi de uıymdastyryldy. Solardyń arasynda Aleksandr Kalıandanyń symnan jasaǵan sýreti, Tatıana Gorbachevanyń tikken oramaly, Násip Ahmetova, Zylıha Tólegenovanyń halqymyzdyń oıýlaǵan ulttyq buıymdary, Alına Mamatdınovanyń kıizden jasalǵan káde-syılary kelýshilerdiń kóńilinen shyqty. Osy festıvalde úzdik shyqqandar oblys ortalyǵynda ótetin «Ánim sensiń, týǵan jer» atty oblystyq festıvalge qatysady.
Farıda BYQAI, Ekibastuz.
...Jastardyń jıyny boldy
A.Toqmaǵambetov atyndaǵy mádenıet úıinde joǵary jáne arnaýly oqý oryndary stýdentteriniń ózin ózi basqarý júıesin damytýǵa baılanysty qoǵamdyq tyńdaý ótti. Oǵan qaladaǵy barlyq oqý oryndaryndaǵy belsendi stýdentter qatysty. Sharany Qorqyt ata atyndaǵy QMÝ «Stýdent jastar odaǵy» qoǵamdyq birlestigi uıymdastyrdy.
Jıyn barysynda «Stýdent jastar odaǵy» qoǵamdyq birlestiginiń tóraǵasy Jandos Bazartaı, oblystyq ishki saıasat basqarmasy bastyǵynyń orynbasary Aıdyn Qaırýllaev, Qazaqstan stýdentter Alıansy Qyzylorda qalalyq ókildiginiń dırektory Jasulan Aldabergenov sekildi azamattar baıandama jasap, stýdent-jastardyń kúrmeýli máseleleri tóńireginde sóz qozǵady. Onan soń jastar bir-birimen pikir alysyp, ózin ózi basqarý júıesi týraly oı bólisti.
Erjan BAITILES, Qyzylorda.