Búgin «Qazmedıa ortalyǵy» ǵımaratynda Aqparat jáne kommýnıkasııalar mınıstri Dáýren Abaev Argentınanyń qoǵamdyq pikir jáne buqaralyq aqparat federaldy júıesi mınıstri E.Lombardımen kezdesti.
Kezdesý barysynda Yntymaqtastyq týraly memorandýmǵa qol qoıyldy. Argentınanyń qoǵamdyq pikir jáne buqaralyq aqparat federaldy júıesi mınıstri E.Lombardıdiń aıtýynsha, memorandým eki eldiń arasynda aqparat almasýǵa jáne jýrnalıster daıyndaýǵa múmkindik beredi. Odan soń argentınalyq qonaqtar «Qazmedıa ortalyǵy» ǵımaratyn aralap, elimizdiń eń iri arnalarynyń jumysymen tanysyp, robottandyrylǵan stýdııanyń tusaýkeserine qatysty.
Qazaqstan men Argentına Respýblıkasy arasyndaǵy dıplomatııalyq qatynas 1993 jyldyń 25 maýsymynda ornatylǵan. Sol ýaqyttan beri eki el arasynda saýda-sattyq pen mádenı-gýmanıtarlyq alańda birqatar mańyzdy qujattarǵa qol qoıylǵan. Argentına - EKSPO-2017 kórmesine qatysýshy el. Mınıstr E.Lombardı Argentınanyń EKSPO-daǵy komıssary. Argentınanyń kórmedegi ulttyq kúni 23 shildege josparlanǵan. Bul sharaǵa QR Aqparat jáne kommýnıkasııalar mınıstri Dáýren Abaev ta qatysady dep kútilýde.
«Qazaqstan men Argentınanyń birigip jumys isteýde ózara úıreneri kóp. Qazaqstannyń túsirgen derekti fılmderi men jobalary bizdiń kórermenge qyzyq bolady dep oılaımyn. Sonymen qatar, kelissózder aıasynda sporttyq sharalardy birlese kórsetetin boldyq. Al EKSPO-2017 kórmesine qatysýǵa múmkindik bergen Qazaqstanǵa erekshe alǵys aıtamyz. Argentına pavılonyna kelińizder», dedi Ernan Lombardı.
Raýan QAIDAR, «Egemen Qazaqstan»
Sýretterdi túsirgen
Orynbaı BALMURAT, «Egemen Qazaqstan»