Saltanatty keshtiń ashylýynda sóz alǵan Qazaqstan Respýblıkasy Mádenıet jáne sport mınıstri Arystanbek Muhamedıuly prezıdent Nursultan Nazarbaevtyń festıval qatysýshylaryna arnaıy joldaǵan quttyqtaý hatyn oqyp berdi.
«Sizderdi osy festıvaldiń ashylýymen quttyqtaımyn. Bul forým Qazaqstannyń mádenı ómirindegi aıtýly oqıǵalardyń biri ári Ortalyq Azııadaǵy basty kınofestıval qatarynan sanalady. Ashyq kreatıv pen onyń tujyrymdamasy ozyq tájirıbemen jáne shyǵarmashylyq ıdeıalarmen tabysty bólisý úshin qolaıly jaǵdaı qalyptastyrady. Bıyl EKSPO-2017 halyqaralyq mamandandyrylǵan kórmesi aıasynda ótip jatýynyń sımvoldyq máni bar. Kórmeniń «Bolashaqtyń energııasy» atty taqyryby kınoforýmnyń teńdestirilgen ári úılesimdi álem qurý jónindegi negizgi mıssııasymen úndes. Osy kıno forým Otandyq kınematografııanyń odan ári damýy men tanymaldylyǵyn arttyrýda. Kınofestıvalde sátti tusaýkeserler, jańa esimder men qyzyqty týyndylar, al kórermenderge umytylymas jarqyn áserge bólenýin tileımin», delingen Prezıdent joldaǵan hatta.
Qazaqstannyń halyq ártisi Aıman Musaqojaeva, KSRO halyq ártisi Bıbigúl Tólegenova, Dımash Qudaıbergenovter óner kórsetip, juldyzdardy halyq zor qoshemetpen qarsy aldy. Bıbigúl Tólegenova men Quman Tastanbek, Merýert О́tekeshovalar XIII Halyqaralyq «Eýrazııa» kınofestıvaliniń uıymdastyrý komıteti taǵaıyndaǵan «Kınematografııa ónerine qosqan úlesi úshin» atty arnaıy syılyqqa ıe boldy. Syılyqty tabystaǵan amerıkalyq akter Nıkolas Keıdj ónerdiń barshaǵa ortaq ekenin aıtady.
– Kıno – kommýnıkasııanyń ámbebap tili. Kıno arqyly búkil álemge tarıhty tarqata alamyz. Kerek deseńiz óz áserimizben bólisip, bir-birimizdi túsinise alamyz. Kınonyń arqasynda mádenı tosqaýyldardy eńsere alamyz. Barshańyzǵa rahmet! – deıdi «Oskar» syılyǵynyń laýreaty Nıkolas Keıdj.
Kınofestıval kórsetilimine alys jáne jaqyn shetelder, Qazaqstan men Ortalyq Azııada túsirilgen 296 fılm engen. Olardyń ishinen iriktelip alynǵan 101 fılm negizgi konkýrsqa qatysady. 14 fılmniń álemdik premerasy, 11 kınotýyndynyń azııalyq tusaýkeseri ótpek. Bulardan bólek kórermen nazaryna taǵy birneshe baǵdarlama aıasynda túrli janrdaǵy fılmder usynylmaq. Atap aıtar bolsaq, «Astana EKSPO-2017» ulttyq kompanııasymen birigip uıymdastyrǵan «6 plaza» damýshy elder baǵdarlamasyna 66 el qatysyp, eń úzdik fılmder anyqtalmaq.
Aıa О́MIRTAI,
Sýretterdi túsirgen Orynbaı BALMURAT, "Egemen Qazaqstan"