Argentınanyń ulttyq kúnine osy eldiń eki mınıstri keldi. Bireýi - Ǵylym, tehnologııalar jáne ınnovasııalar mınıstri Nıno Baranao, ekinshisi - Buqaralyq aqparat quraldary jáne qoǵamdyq pikir mınıstri Ernan Lombardı. Olardy QR Aqparat jáne kommýnıkasııalar mınıstri Dáýren Abaev qarsy aldy.
«Qazaqstan argentınalyqtardy tamasha tabıǵaty, baı mádenıeti jáne qaıtalanbas ulttyq minezi bar halyq retinde jaqsy biledi. Ol jerden álemge tanymal talaı oıshyldar shyqqan. Býenos-Aıres - áserli tangonyń astanasy bolyp sanalady. Al Maradona men Messı sııaqty fýtboldyń maıtalmandaryn Qazaqstannyń jankúıerleri de jaqsy kóredi. Búgin biz osy eldiń mádenıeti men tarıhymen jaqyn tanysa alamyz», dedi Dáýren Abaev.
Al Argentınanyń eki mınıstri qazaqtyń qonaqjaı halyq ekenin erekshe atap ótip, EKSPO-nyń kásibı turǵyda úlken daıyndyqpen ótip jatqanyn jetkizdi. Ernan Lombardı Qazaqstan men Argentınanyń negizgi uqsastyǵyna toqtaldy.
«Bizde san alýan ulttar men ulystardyń ókilderi turady. Olardyń tili de, dini de áralýan. Degenmen, barlyǵy da tatýlyq men beıbitshilikte ómir súredi. Osylaısha, Argentına da Qazaqstan sııaqty mýltımádenıetti qoǵamnyń bolǵany qalaıdy. Biz úshin tabıǵı resýrstardan buryn osy adamdar resýrstary qymbat bolyp tur. Onsyz eshqandaı memleket damýdyń dańǵyl jolyna túse almaıdy», dep atap ótti.
О́z sózinde ol Merkosýr uıymy men Eýrazııalyq ekonomıkalyq odaq arasyndaǵy áriptestik baılanystardy da tilge tıek etti. Sol arqyly yntymaqtastyq baılanystar úshin jańa múmkindikter ashylyp otyr.
Resmı bólimnen keıin argentınalyqtar shaǵyn konserttik baǵdarlamany usyndy. Sodan soń, osy eldiń ulttyq pavılonyna deıin merekelik sherý uıymdastyryldy.
Aıta keteıik, kúni keshe QR Aqparat jáne kommýnıkasııalar mınıstri Dáýren Abaev pen Argentınanyń Buqaralyq aqparat quraldary jáne qoǵamdyq pikir mınıstri Ernan Lombardı ózara yntymaqtastyq týraly memorandýmdy rásimdedi. Atalǵan qujat aıasynda jýrnalıst mamandardy birlesip daıarlaý qarastyrylǵan.