Saltanatty sharany ashqan Qazaqstan respýblıkasynyń mádenıet jáne sport mınıstri Arystanbek Muhamedıuly, «Ulttyq kınematografııa óneri men ǵylymdary akademııasy» qoǵamdyq birlestiginiń prezıdenti Aıman Musaqojaeva, Astana qalasynyń ákimi Áset Isekeshov pen «Oskar» jáne «Altyn gloýbs» ıegeri Nıkolas Keıdj balalarǵa sáttilik tiledi. Kóptegen shet eldik konkýrstardan júldeli oryndar alyp júrgen «Celebrity» shoý-mım balalar teatrynyń qatysýshylary sahnalaǵan kóńildi spektakl festıval sánin asha tústi.
Festıval kezinde Qazaqstan, Fransııa, Nıderland, Qytaı, Aýǵanstan, Iran, Týnıs, Perý, Úndistan, Meksıka, Ispanııa, Italııa, Danııa, Grýzııa syndy elderdiń shyǵarmashylyq toptarynyń 15 fılmi kórsetiledi. Kınoforýmnyń qazylar alqasy qazaqstandyq talantty balalardan qurylǵan. Olar «Úzdik fılm», «Úzdik ssenarıı», «Úzdik bala beınesi» atalymdary boıynsha jeńimpazdardy anyqtaıdy.
Alty baladan quralǵan qazylar alqasynyń tóraǵasy Nurbek Sádýaqasov Astana qalasyndaǵy №56 mektep-lıseıiniń 11 synyp oqýshysy. Ol astanalyq «Celebrity» shoý-mım balalar teatrynyń belsendi múshesi. Teatr ujymy 2016 jyly Bolgarııada ótken «Golden Dream» halyqaralyq konkýrsta gran-prı, 2016 jyly Sochı qalasynda ótken «Kınotavrık» óner festıvalinde bas júldege ıe bolǵan.
«Festıval óte joǵary deńgeıde ótip jatyr dep senimdi túrde aıta alamyn. Osy bes kún boıy balalar konkýrsyna qatysyp jatqan kıno týyndylardy shynaıy baǵalap, úzdikterin anyqtaıtyn bolamyz. Men úshin eń mańyzdy – sıýjet birtutastyǵy men shyǵarma túıini», deıdi jas tóraǵa.
Al qazylar alqasynyń eń kishkentaı múshesi – Adelıa Abdýllına. Ol qazaq ulttyq mýzyka akademııasynyń 2 synyp oqýshysy. Qazir balalarǵa arnalǵan ázil-syqaq fılminiń túsirilim jumystaryna qatysyp jatyr.
Aıa О́MIRTAI,
"Egemen Qazaqstan"