«Astana Opera» ǵımaratynda osyǵan oraı baspasóz konferensııasy ótti. Oǵan Mádenıet jáne sport mınıstri Arystanbek Muhamedıuly, «Astana Opera» teatrynyń dırektory Ǵalym Ahmedııarov jáne Plasıdo Domıngo qatysty.
Alqaly jıynda alǵysózdi alǵan Arystanbek Muhamedıuly baıqaýdyń qazylar alqasymen qysqasha tanystyryp ótti. Olardyń qatarynda Italııadaǵy «Karlo Felıche» teatrynyń kórkemdik jetekshisi Djýzeppe Akýavıva, Parıj ulttyq operasynyń dırektory Ilıas Sempetonıdıs, Vena memlekettik operasynyń dırektory Domınık Meıer, Nıý-Iorktegi Metropolıten operasynyń kórkemdik jetekshisi Djonatan Frend sekildi klassıkalyq óner álemine tanymal tulǵalar bar.
– Baıqaýdyń tartysqa toly óterine kúmánim joq. Sebebi, buǵan álemniń 17 elinen 40 daryndy ánshi qatysady. Olar halyqaralyq jarystyń aqtyq kezeńine joldama aldy. Al irikteý kezeńinen súrinbeı ótý ońaı emes. Taǵy bir aıta keterligi, «Operalııa» osyǵan deıin Vashıngton, Madrıd, Gambýrg, Tokıo sekildi álemniń iri qalalarynda ótken. Mundaı jahandyq sharany óz elimizde joǵary deńgeıde ótkizý úlken jaýapkershilikti talap etedi, – dedi mınıstr.
Opera janyńdy terbetip, ózińdi beıne bir ózge álemge alyp ketkendeı kúıde qaldyrady. Al osy opera áleminde ózindik qoltańbasyn qalyptastyrǵan Plasıdo Domıngo sekildi ánshiniń áıgili «Operalııa» konkýrsyn Astanada ótkizýi – qazaqtyń ónerge qanshalyqty jaqyn halyq ekeniniń birden bir dáleli.
Jıynda sóz alǵan Plasıdo Domıngo «Operalııanyń» Astana qalasynda EKSPO kórmesi kezinde ótýine múmkindik jasalǵany úshin alǵysyn bildirdi.
– Qazaqstan astanasyna alǵash ret osydan toǵyz jyl buryn keldim. Osy ýaqyt aralyǵynda qala adam tanymastaı ózgerip ketken dep aıtýǵa bolady. Al qazaq halqynyń ónerdi joǵary baǵalaıtynyn óz basym burynnan bilemin. Bul jolǵy baıqaý da joǵary dárejede ótedi degen úmittemin. Al fınalǵa shyqqan daryndarmen aldaǵy ýaqytta tyǵyz baılanysta bolyp, ánshilik qabiletteriniń artýyna septigimdi tıgizsem deımin. Negizi osy jarystyń jeńimpazdary ǵana emes qatysýshylarynyń da keıinirek óneri órge júzip, álemge tanyla bastaıdy. Solardyń biri retinde «Operalııanyń» 1993 jylǵy, ıaǵnı alǵashqy jeńimpazy atanǵan shvesııalyq Nına Shtemendi aıtýyma bolady. Bárine sáttilik tileımin, – dedi maestro.
Baıqaýǵa Qazaqstan atynan «Astan Operanyń» solısi, birneshe halyqaralyq baıqaýlardyń jeńimpazy Marııa Mýdrıak, sondaı-aq, Rasýl Jarmaǵanbetov, Damır Sádýaqasov, Stanıslav Lı el namysyn qorǵaıdy. Úmitkerler álemdik opera klassıkasynan ózderi tańdap alǵan arııalardy «Operalııa» konsertmeısterleriniń súıemeldeýimen oryndaıdy. Báıge sharty boıynsha 18 ben 32 jas aralyǵyndaǵy ánshiler iriktelindi. Al jalpy júlde qory 180 myń AQSh dollaryn quraıdy.
«Operalııa» baıqaýyna Reseı atynan qatysqaly otyrǵan Elena Gýseva jarys aldyndaǵy tolqynysy jaıly bylaısha oı bólisti.
– Shynymdy aıtsam, operaǵa yntyq bolýyma dál osy Plasıdo Domıngo tikeleı sebep boldy. Sol kisiniń konkýrsyna qatysqaly otyrǵanyma áli sene alar emespin. Bul baıqaýǵa bas júldeni ıelenýdi maqsat etip kelgenim joq. Tek ózimniń kýmırim bolǵan uly tulǵanyń maǵan arnaǵan biraýyz jyly lebizin estisem, sonyń ózi men úshin úlken jetistik, – deıdi Elena aǵynan jarylyp.
Aıta keteıik, 24-26 shilde aralyǵynda shırek fınal men jartylaı fınal kezeńderi ótedi. Al 29 shildede, ıaǵnı aqtyq synǵa joldama alǵan on úmitker ózara jeńimpazdy anyqtaıtyn bolady.
Aıan ÁBDÝÁLI, «Egemen Qazaqstan»
Sýretterdi túsirgen
Orynbaı BALMURAT, «Egemen Qazaqstan»