Farmasevtıka salasynyń quny sharyqtap turǵan qazirgi zamanda tegin nemese jeńildikpen beriletin dáriler jurtshylyqqa úlken kómek ekeni sózsiz. Mysaly, aǵzasyn aýystyrǵandar otadan keıin ómir boıy ımmýnıtetti tómendetetin dáriler qabyldaýǵa májbúr. Eger ony ishpese, jańadan salynǵan baýyr nemese búırek ımmýnıtettiń shabýylyna ushyrap, jaramsyz bolyp qalýy múmkin. Al ımýnnodepressanttardyń quny óte qymbat, bireýi shamamen 40 000-60 000 teńge aralyǵyn quraıdy. Mundaı dárilerdi satyp ala berýdi qarapaıym halyqtyń qaltasy kótermesi anyq. Sondyqtan Qazaqstan óz azamattaryna kómek retinde keıbir dárilerdi tegin berip keledi. Kóptegen memleketterde mundaı jeńildikter qarastyrylmaǵan. Jer betinde aǵzasyn aýystyryp aman qalǵanymen, oǵan qajetti dárini ala almaı ajal qushqandar qanshama...
Elimizdiń Densaýlyq saqtaý mınıstrligi kúni keshe «Tegin medısınalyq kómektiń kepildik berilgen kóleminiń sheńberinde jáne mindetti áleýmettik medısınalyq saqtandyrý júıesinde ambýlatorııalyq deńgeıde tegin nemese jeńildikpen qamtamasyz etýge arnalǵan dárilik zattarmen jáne medısınalyq maqsattaǵy buıymdarmen, onyń ishinde belgili bir aýrýlary (jaı-kúıleri) bar azamattardyń jekelegen sanattaryna arnalǵan dárilik zattardyń jáne mamandandyrylǵan emdik ónimderdiń tizbesin bekitý týraly» buıryq shyǵardy. Atalǵan buıryq 2018 jyldyń 1 qańtarynan kúshine enedi.
Mınıstrliktiń buıryǵynda belgili bir aýrýdy emdeýge tegin beriletin dári-dármektiń tizbesi bekitilgen. Atap aıtqanda, arterıaldyq gıpertenzııa, asqazannyń oıyq jarasy, tynys demikpesi, qaterli isik aýrýlary, týberkýlez, gematologııalyq aýrýlar, gemoblastozdar, aplazııalyq anemııa, balalardyń serebraldyq sal aýrýy, psıxıkalyq syrqattar, AITV ınfeksııasy syndy bas-aıaǵy 48 aýrý túrine tegin beriletin dáriler tizbesi bar. Bulardyń qataryna jańadan Behterev aýrýy qosyldy. Omyrtqanyń qımylsyz qalýymen sıpattalatyn sozylmaly dertke shaldyqqandar endi qajetti dárilerdi tegin ala alady.
Jalpy, mınıstrlik bekitken dárilerdiń jańa tizbesinde tıimdiligi dáleldengen 59 jańa dári, 256 dárilik zat bar ekenin atap ótken lázim. Mundaı dárilermen dıspanserlik esepte turǵan 2 mıllıonnan astam adam qamtylady dep josparlanyp otyr. Bul ózgerister múgedektik deńgeıin, áleýmettik mańyzy bar aýrýlardan bolatyn ólim-jitimdi azaıtýdy kózdeıdi, deıdi mınıstrliktiń baspasóz qyzmeti.
Qymbat TOQTAMURAT, «Egemen Qazaqstan»