Árıne, Reseı tarapy da bul kezdesýge múddeli ekenin aıta ketý kerek. Sebebi, Jetisý óńiriniń áleýmettik-ekonomıkalyq damýy men bolashaqtaǵy jospary kim-kimniń de óz isin senimdi túrde bastaýyna múmkindik beredi. Bul týrasynda ákim meımandardy oblystyń tynys-tirshiligimen tanystyrý kezinde keńinen áńgimeledi.
– О́zderińiz jaqsy bilesizder, Almaty oblysy elimizdegi iri agrarlyq ólkelerdiń biri bolǵandyqtan munda qant qyzylshasy, maıburshaq, júgeri ósiriledi. Ásirese, óńirde qant qyzylshasyn jandandyrýǵa barynsha kóńil bólýdemiz. О́tken jyly Kóksý qant zaýytyn iske qostyq. Al bıyl Aqsý qant zaýytyn iske qosý úshin ınvestorlar tartyldy. Jalpy, túrli memlekettik baǵdarlamalardyń nátıjesinde kásipkerler men bıznes ókilderine qoldaý bildirýge, aýyl sharýashylyǵyn damytýǵa barlyq jaǵdaıdy jasap kelemiz. Investorlarǵa kórsetilgen zor múmkindikterdiń arqasynda kóptegen sheteldik iri kompanııanyń biri óz kásiporyndaryn ashyp jatsa, endi biri zaýyttarynyń qurylysyn bastap ta ketti. Sonyń ishinde reseılik «Lýkoıl» jáne «Rollton» zaýyttary da bar. Áriptestik qarym-qatynas nátıjesinde budan da ózge iri kásiporyndar men zaýyttar salynady dep senemin, – dedi oblys ákimi.
Aıta keterlik bir jaıt, Soskoves myrza osy óńirdiń týmasy bolyp shyqty. Osydan alty jyl buryn arnaıy saparmen bir kelipti. Sol kezde 90-jyldardaǵy keıpinen adam tanymastaı jańa keıip tapqan Taldyqorǵanǵa bir tańdansa, bıylǵy saparynda alty jyldyń ishindegi ózgeriske eki tańdanyp otyrǵanyn jetkizgen «Eýrazııalyq iskerlik keńes» kommersııalyq emes seriktestiginiń úılestirý keńesiniń tóraǵasy:
– Osy kıeli mekende ómirge kelgendikten, bul jer maǵan óte ystyq. О́ńirdiń búgingi kelbetin burynǵymen salystyrýǵa kelmeıdi. Birshama ıgi isterdiń atqarylǵany birden baıqalyp tur. Endi aldaǵy ýaqytta yntymaqtastyqpen halyq ıgiligi úshin qyzmet etetin bolamyz. Men tóraǵalyq etetin uıym Eýrazııa aýmaǵyndaǵy kásiporyndar men kompanııalardyń arasyndaǵy saýda-ekonomıkalyq áriptestikke negizdelgendikten, árıne, sizderdiń shaqyrýlaryńyzdy barynsha tıimdi paıdalanyp, barlyq múmkindikti jiti tarazylaımyz. Sol sebepti búgingi kezdesýimiz qos tarapqa da nátıjeli bolatyndyǵyna senimdimin, – dedi.
Kezdesý sońy kelisim bolmaǵy shart. О́zara jınaqy áńgimeden soń qos tarap saýda-ekonomıkalyq qatynastardy damytýǵa yqpaldasý jónindegi yntymaqtastyq memorandýmyna qol qoıdy.
Oleg Soskovestiń oblysqa sapary munymen aıaqtalǵan joq. Oblystyq kásipkerler palatasy ókilderimen kezdesti. Otyrysta bizdegi shaǵyn jáne orta bıznestiń aıaq alysymen tanysyp, bolashaqta eki el kásipkerleri arasynda berik yntymaqtastyq ornatý jaıynda sóz qozǵaldy.
Almas NÚSIP, «Egemen Qazaqstan»
Almaty oblysy