Osy jyldyń naýryz-mamyr aılarynda jobanyń 1-shi kezeńi Aqtaý qalasyndaǵy №31 «Erkemaı», №53 bóbekjaı jáne №54 «Aınalaıyn» balabaqshalarynda júrgizildi. Atalǵan joba arqyly elektr energııasyn paıdalaný kólemi 40 %-ǵa azaıdy. Mysaly, №31 «Erkemaı» bóbekjaıynda jumsalatyn elektr qýatynyń kólemi 4500 KVt-tan 2130 KVt-qa azaısa, №54 «Aınalaıyn» balabaqshasynda 6620 KVt-tan 5100 KVt-qa azaıdy. Aldaǵy ýaqytta osy jobany 24 mektep pen balabaqshalarda engizý josparlanýda, dep habarlaıdy Mańǵystaý oblysy ákiminiń baspasóz qyzmeti.
- Barshaǵa málim, 2015 jyly Qazaqstan Respýblıkasy Úkimeti men halyqaralyq Qaıta qurý jáne Damý Banki arasynda «Qazaqstanda energııa tıimdiligin arttyrý» jobasy boıynsha grant týraly kelisimge qol qoıyldy. Grant qarajaty shveısarııalyq damý jáne yntymaqtastyq agenttigimen Dúnıejúzilik bank ákimshilik jasaıtyn Senimgerlik qor arqyly berildi, - dedi Eraly Toǵjanov.
Jınalystan keıin oblys ákimi men Shveısarııalyq konfederasııa ókilderi №53 bóbekjaıdy aralady.
- Atalǵan jobanyń artyqshylyqtary qataryna bizge jylý radıatorlarynyń tolyǵymen aýystyrylýy, jaryqdıodty energııa únemdeýish shamdar men avtomattandyrylǵan jylý pýnktiniń qondyrylýy kiredi. Biz jasaǵan taldaýdyń nátıjeleri bizdi óte qýantty. Mysaly, ótken jyldyń mamyr aıynda elektr energııasyna 55 pen 70 myń aralyǵynda tólegen bolsaq, aǵymdaǵy jyldyń mamyr aıynda 35 myń teńge tóledik, - dedi Sáýle Álibekova, № 53 sanatorııalyq-týberkýlezdik bóbekjaıdyń dırektory.
Aıta keteıik, energııa tıimdiligin arttyrý jobasy Qazaqstan boıynsha birinshi bolyp Mańǵystaý oblysynda bastaý aldy, sondaı-aq aldaǵy ýaqytta atalǵan jobany respýblıkamyzdyń ózge de oblystarynda engizý josparlanýda.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy