Batys Qazaqstan oblysynyń ákimdiginde ótken keńeste AО́K damytýdyń memlekettik baǵdarlamasyn júzege asyrý barysy, ondaǵy mindettemelerdi oryndaý boıynsha bekitilgen ındıkatorlar men sharalar jetistigi talqylandy.
Memlekettik baǵdarlama aıasynda bıylǵy jyly sýbsıdııanyń 65 túri qarastyrylyp, sonyń nátıjesinde 11 tıimsiz sýbsıdııany alyp tastap, 40 sýbsıdııanyń ólshemderi ózgertildi. Al qalǵan 14-i esh ózgerissiz qaldy.
Mal sharýashylyǵynda ólshemderdi ózgertý dál sol qarjy sheńberinde sýbsıdııa alýshylardyń sanyn bir esege arttyrdy. Eger bastapqyda sıyr eti boıynsha sýbsıdııany 175 sharýashylyq alsa, qazir ol 522-ge nemese 100%-ǵa artty; sút boıynsha 2 esege; qoı eti boıynsha 1,3 ese, jún boıynsha 3,6 ese artty. Sondaı-aq, qoı etin sýbsıdııalaý odan góri tıimdirek qozy etimen almastyryldy.
2017 jyldyń 1 shildesindegi jaǵdaı boıynsha Batys Qazaqstan, Aqtóbe oblystarynda iri qara maldyń, usaq qara maldyń, jylqylardyń, qustardyń sanynyń kóbeıý úrdisi baıqaldy.
Qazirgi tańda respýblıkada 1345 qaıta óńdeý kásiporyny belsendi jumys jasap jatyr. Sút, et, teri, jún, maı jáne daqyl ónimderin, tuqymdar men kókónister, qant qyzylshasyn jáne kartopty qaıta óńdeıtin 435 kásiporynnyń ishinde ónimderdi uqsatýdyń 9 basym túri anyqtaldy. Solar boıynsha ár oblys, ár aýdan boıynsha agrarlyq qaıta óńdeý kásiporyndarynyń naqty ornalasý kartasy jasaldy.
Keńes barysynda Premer-Mınıstrdiń orynbasary – Aýyl sharýashylyǵy mınıstri fermerlerdiń barlyq qyzyǵýshylyq tanytqan suraqtaryna jaýap berdi.
Sondaı-aq, jumys sapary kezinde A.Myrzahmetov Jáńgir han atyndaǵy Batys Qazaqstan agrarlyq-tehnıkalyq ýnıversıtetine, «POSh Rýno» JShS teri óńdeý kásipornyna bardy.
* * *
Vıse-premer jumys baǵdarlamasyna sáıkes Mańǵystaý oblysyndaǵy Túpqaraǵan aýdanynyń Aqshuqyr aýylyndaǵy «Kazah osetr» JShS-na bardy. Atalǵan seriktestik óńirdegi birden-bir bekire etin shyǵaratyn bekire fermasy bolyp tabylady.
Munan soń oblystyq ákimdikte AО́K-ti damytýdyń memlekettik baǵdarlamasyn iske asyrýǵa arnalǵan otyrys bolyp ótti jáne de onda mal sharýashylyǵy, mal sharýashylyǵy ónimderin qaıta óńdeý, veterınarlyq qaýipsizdik pen balyq sharýashylyǵy máseleleri qaraldy.
Otyrysqa Mańǵystaý jáne Atyraý oblystarynyń turǵyndary, sharýalar men salalyq qoǵamdastyqtardyń ókilderi qatysty.
Osynaý eki oblystyń Kaspıı mańyndaǵy geografııalyq turǵyda qanattasa ornalasýyn eskere otyryp, birinshi kezekte balyq sharýashylyǵyna basa mán berildi. Ol jerde aǵymdaǵy jaǵdaıǵa baılanysty buǵan deıin dástúrli túrde óndiristik aýlaýǵa negizdelip kelgen balyq sharýashylyǵy salasynyń kóp jyldyq strategııasyn túbegeıli ózgertý kerektigi atap ótildi.
Budan ári de mal sharýashylyǵy men aýylsharýashylyq kooperasııalary máseleleri talqyǵa tústi. Búginde el aýmaǵynda 517 aýylsharýashylyq kooperasııasy bar bolsa, olardyń 15-i Atyraý oblysynda tirkeýli.
Bıyl shildede byltyrǵy jyldyń osy kezeńimen salystyrǵanda Mańǵystaý jáne Atyraý oblystarynda iri qara mal men usaq qara mal basynyń, jylqy, túıe, qus sanynyń ósý tendensııasy baıqalýda.
Otyrys barysynda A.Myrzahmetov suraq-jaýap formatynda qatysýshylardyń saýaldaryna jaýap berdi.
Jumys saparyn qorytyndylaı kele, vedomstvo basshysy «Aqbıdaı» astyq termınaly men Aqtaý teńiz termınalynda boldy.