Olardyń qatarynda jamby atýdan jastar jáne jasóspirimder arasynda elimizdiń birneshe dúrkin chempıony, ońtústikqazaqstandyq mergender – Aıkóz Eralhan men Aıtbek Sarybaı, Qyzylorda oblysynyń mergeni Bekqalı Ýzdenbaev jáne jambyldyq surmergender – «Uly Dala oıyndary» festıvaliniń jeńimpazy Eldos Badashov pen jas jambyshy Abzal Týlybaev bar. «Adyrnasyn ala ógizdeı móńiretý» úshin alystan at terletip 20 elden kelýi tıis 50-ge tarta sadaqshymen saıysatyn bizdiń azamattar qazir «Qazanat» atshabarynda oqý-jattyǵý jıynyn bastap ketipti. Mergenderdiń bas bapkeri Nurken Baıbórıev myrzanyń aıtýyna qaraǵanda, bizdiń sadaqshylar osal emes, qazirdiń ózinde dál báseke basynda júrgendeı jınaqy, sergek, kózdegenin qapy jibermeı, adyrnadan atylyp ushqan jebeleri nysanaǵa sart-sart qadalýda... Bapkerdiń sózi ras eken. Ony biz de kórdik. «Qoblandy batyr» jyrynda: Qolyna alyp tolǵanyp, Qozy jaýyryn jebeni At ústinen shirenip, Tolǵap turyp tartady... – dep jyrlaǵandaı bizdiń jigitter quıǵyta shaýyp ótip te, at ústinde turyp ta sadaq tartyp úırenip úlgeripti. Tipti 10 sekýndta bes jebe atyp, barlyǵyn da nysanaǵa dóp tıgizgenin kórdik. Iske sát surmergender!
Toptamany ázirlegen Beken Qaıratuly, «Egemen Qazaqstan»