Ataqty ushqysh Núrken Ábdirovtiń Qaraǵandydaǵy áıgili eskertkishi sán-sáýletimen alysqa aıan bolsa, odan soń boı kótergen «Shahter dańqy» da sondaılyq tanymal.
Osyndaı erekshe óner týyndylaryn dúnıege keltirgen seksennen asqan qarııa Anatolıı Petrovıch Bılyk ekenin de aıta ketken jón. Onyń tastan qashalǵan eńbekteri qazir elimizdegi biraz qalalardyń kóshelerin kórkeıtip tur.
Oblystyq muraǵattar jáne qujattama basqarmasy bastamashylyǵymen munyń aldynda jazýshy Jaıyq Bekturovtyń, ólketanýshy Iýrıı Popovtyń jeke muraǵattyq qory memlekettik saqtaýǵa alynsa, endi olardyń qataryn Anatolıı Bılyk qolyndaǵy jádigerler, qujattar, albomdar, kitaptar tolyqtyrdy. Sol arqyly músinshiniń shyǵarmashylyq jolymen keńirek tanysýǵa bolady.
Muraǵatshylar bul kúnde Izraılde turatyn, «Ortalyq Qazaqstan» gazetiniń burynǵy fototilshisi Iýrıı Heıfıstiń óńir ómirinen túsirilgen sýretterin suratyp alyp, saqtaýǵa qoıýdy qolǵa alyp jatyr. Aımaq eleýli tulǵalarynyń jeke muraǵattyq qoryn kópshilik ıgiligine usyný sharalary jalǵasa beredi.
Aıqyn NESIPBAI.
Qaraǵandy.