Túmen topyraǵyndaǵy torqaly toı

Quryltaıdyń estafetasyn ár aýdan kezekpen qabyldaı­dy eken. Bul joly Berdıýje aýdany­nyń ákimshiligi men osynda ju­mys jasaıtyn qazaq dıaspora ókil­digi qushaq jaıa qarsy alyp, erekshe qonaq­jaılylyq tanytty. Alqaly basqosýda sóı­legen cheshender Túmenniń tor­qaly topyraǵynda osymen 21-shi ret ótip otyrǵan quryl­taıdyń el men eldi baı­la­nystyratyn, halyq pen halyqty jaqyndastyratyn, jas býyndy ana tili men ulttyq salt-dás­túrlerin, ádet-ǵuryp­taryn umyt­paýǵa, tanyp-bilýge umtyl­dyratyn ıgi shara ekenin atap kórsetti. Túmen oblystyq qazaq ulttyq-mádenı avto­nomııasynyń tóraǵasy Esimhan Jantasovtyń jalyndy sózderi jınalǵandardy sútteı uıytty.

– Jat jerde júrsek te, esh kem­dik kórip otyrǵan joq­pyz. Qazaq­stannyń, El­basy Nursultan Nazarbaevtyń shette júrgen aǵaıyndarǵa jasap otyrǵan jan-jaqty qam­qor­lyǵyna sheksiz rızamyz. Buryn jastarymyz ana tilinde sóıleýge uıalatyn. Qazirgi ta­lap­tary zor. Biz óz tara­py­myz­dan túrli baıqaýlar, kon­kýrs­tar ótkizip, qal-qadirimizshe muryn­dyq bolyp kelemiz, – dedi ol.

Teriskeılik delegasııany bastap barǵan oblystyq assamb­leıanyń hatshylyq meńgerýshisi Naıl Salımov eki óńirdi shekara bólip turǵanymen, mádenı-rýhanı tutastyq tereńde jat­qanyn, qaı salada bolmasyn berik yntymaq ornaǵanyn aıta kelip, aımaq basshysy Qumar Aqsaqalov berip jibergen ar­naıy syılyqty salta­natty túrde tabys etti.

Osynda «Regıon Tıýmen» telearnasynyń aǵa redaktory Aleksandr Lıshenkomen tanys­tyq. Sóıtse, ol Qazaqstanda dúnıege kelipti. Qazaq eli jaı­ly aıtqan jyly sózderi jany­myzǵa maı­daı jaǵyp, bardyń qadirin bil­meı, parqyna jet­peı júrgen jer­lesterimdi eske aldym. Sasha kishkentaı kezi­nen Abaıdyń óleńderin jat­tap, Qurmanǵazynyń kúı­lerin tyńdap ósipti. Balalyq shaǵy munartyp qalǵan ortasyn, qulyn-taıdaı tebisip ósken dos­­taryn saǵynǵany birden aıtoı­lap turdy. Birde-bir quryl­taıdan shet qalmapty.

Túmen tórindegi qazaq toıy­nyń ajaryn balýandardyń kúresi, alaman báıge, dástúrli ánder baı­qaýy, qyz syny odan ári asha tústi.

Jyraqta júrse de, júregi ata­meken dep soǵatyn, tilegi de, tileýi de ortaq aǵaıyn­darymyzdyń turmys-tirshiligi­ne qanyǵyp qaıttyq.

Saǵyndyq MAÝǴAZIN, jýrnalıst

Soltústik Qazaqstan oblysy