Tarata aıtsaq, jańa jumys oryndaryn ashý arqyly 13047 adam eńbek etý quqyna ıe bolmaq. «О́rleý» baǵdarlamasy aıasynda turmysy tómen otbasylardy qamtýǵa birinshi kezekte basymdyq berilgen. Osyǵan oraı 270 áleýmettik kelisimshart jasalyp, 1200 adam qatysýshyǵa nıet bildirgen. Buryndary bıýrokrattyq kedergiler men qaǵazbastylyqtar saldarynan qujattardy rásimdeý birtalaı qıyndyqtar týdyrsa, qazir bul úderis áldeqaıda ońaılanǵany baıqalady. Jobaǵa qatysý úshin otbasy egesi bolmasa músheleri turǵylyqty jerdegi jumyspen qamtý ortalyǵyna ne aýyldyq ákimdikke qaırylyp, tıisi qujattardy usynsa jetkilikti, deıdi mamandar.
Baǵdarlamanyń ıgiligin kórýshiler tıimdiligin aıqyn sezinip otyrǵandaryn aıtady. Ataýly áleýmettik kómek alýshylar arasynda eńbekke jaramdy turǵyndar úlesiniń 1,7 paıyzǵa kemýi sózimizdiń bir dáleli bolsa kerek. Endigi maqsat kirisi ómir súrý deńgeıinen tómen toptaǵylardyń sanyn 15,1 myńǵa deıin azaıtýǵa baǵdarlanǵan.
Sóz arasynda nátıjeli jumyspen qamtý jáne kásipkerlikti damytý baǵdarlamasyn júzege asyrýǵa respýblıkalyq qazynadan 4,5 mıllıard teńge bólingenin, shaǵyn nesıeleý mólsheri 2,5 esege artyp, 2,3 mıllıard teńge qarastyrylǵanyn aıta ketken jón.
Sol sııaqty «Bastaý bıznes» baǵdarlamasy da ómirsheńdigin kórsetip keledi. Onyń sheńberinde 920 adamdy kásipkerliktiń qyr-syryna úıretý belgilense, úshten biri qysqa merzimdi kýrstardy aıaqtap shyqqan. 30 adam nesıe alý kezeginde tur. 5 adam 11 mıllıon jeńildikti qarajatqa qol jetkizgen. Tutastaı alǵanda, jumyssyzdar men ózin-ózi jumyspen qamtamasyz etetin sanattaǵylardan alty myńnan astam qatysýshyǵa memlekettik baǵdarlamalardyń jeńildikti qyzmetteri usynylǵan. Aýyl sharýashylyǵyn qarjylyq qoldaý qorynyń jergilikti fılıaly da belsendiligin kúsheıte bastaǵan syńaıly.
Vedomostvo basshylarynyń aıtýlarynsha, jyl aıaǵyna deıin jumyssyzdar sany – 600, ózin-ózi eńbekpen qamtıtyndar 5000 adamǵa azaıyp, jaldamaly qyzmetkerler 3,5 myńǵa ulǵaıatyn bolady.
Jyl basynan beri 13 myń soltústikqazaqstandyq jumysqa ornalasyp, bala-shaǵa nápaqasyn aıyryp otyr.
О́mir ESQALI, «Egemen Qazaqstan»
Soltústik Qazaqstan oblysy