Osyndaı aqjoltaı jańalyqty eń birinshi bolyp belgili tarıhshy, «Sakraldy Qazaqstan» ǵylymı-zertteý ortalyǵynyń basshysy Berik Ábdiǵalı óziniń feısbýgtegi paraqshasynda: «Kóne dáýirdiń kózindeı bolǵan qundy jádiger! Saq dáýirine tán túrli dúnıeni búginge bútindeı jetkizgen Altaı taýlary mańyndaǵy Berel qorymynan Zeınolla Samashev bastaǵan ekspedısııalyq toptyń qazba jumystary nátıjesinde taǵy bir Altyn adam tabyldy. «Qasıetti Qazaqstan» baǵdarlamasy aıasynda Shyǵys Qazaqstan oblysyna issaparǵa baryp, osyndaı aıtýly jańalyqqa kýá boldym», dep súıinshileı habarlaǵan bolatyn.
Bul jańalyqty estı sala biz de elmen birge eleń etisip birden Zeınolla Samashevpen baılanysqa shyǵyp, uıaly telefon arqyly az-kem tildesken edik.
«Jurttyń bári «Altyn adam tabyldy» dep shýlap jatyr eken. Olaı deýge kelmes. Munda jerlengen adamnyń saq kezeńine jatatyny, aqsúıekter áýletiniń ókilderiniń biri ekeni anyq. Biraq hanshaıym nemese patshaıym deýge kelmeıdi. Olardyń jerleý rásimderi basqasha. Qorǵannan shyqqan adamnyń janynan bas kıimniń birneshe áshekeı bólshekteri tabyldy. Sáýkelege uqsaıdy. Soǵan qaraǵanda qorǵanda jerlengen kisi áıel adam dep boljap otyrmyz. Bul adam jerlengennen keıin bir-eki jyldan soń aıaýsyz tonalǵan bolýy kerek. Máıitti súıregen kezde sáýkele bólshekteri qalyp qoıǵan sekildi. Ústindegi ishik tony da kóptegen juqa altyndarmen bezendirilgen bolýy kerek, ony da túk qaldyrmaı tonap, alyp ketken. Máıit janynan qumyra synyqtary men qoıdyń quıymshaǵynyń qaldyqtary tabyldy. Sonymen qatar qorǵan ishinen eki at taptyq. Qos attyń biriniń basyndaǵy júgenniń bólshekteri jaqsy saqtalǵan eken. Jalpy, bul qorǵan qatty tonalǵan. Áıel adamnyń súıekteri byt-shyt bolyp, jan-jaqqa shashylǵan», degen arheolog qorǵandaǵy qazba jumystary áli de jalǵasyp jatqanyn, aldaǵy ýaqytta bul jerdi de mýzeıge aınaldyrý qajet ekendigin aıtty.
Osy qazba jumystarynyń basy-qasynda júrgen Bereldegi qoryq-mýzeıdiń dırektory Jangeldi Ahmadıevtiń aıtýynsha, bul qorymdaǵy, ıaǵnı №5 qorǵandaǵy qazba jumystary Shyǵys Qazaqstan oblysy ákimdiginiń qoldaýymen, Zeınolla Samashevtiń jetekshiligimen osy jyldyń maýsym aıynyń basynda bastalǵan eken. Qorǵannan tabylǵan adam qaraǵaıdan jasalǵan tabytqa jerlenipti. Tabyttyń uzyndyǵy – 2,5 metr, eni – 2 metr shamasynda. Al qorǵannyń bıiktigi 7 metr, dıametri 20 metr eken.
Azamat QASYM, «Egemen Qazaqstan»
Shyǵys Qazaqstan oblysy,
Katonqaraǵaı aýdany
(Sýretter Berik Ábdiǵalıdiń feısbýktegi paraqshasynan alyndy)