Qorǵanys mınıstrliginiń resmı saıtynyń málimetinshe, bul shara elder arasyndaǵy dostastyq pen qarym-qatynastardyń yntymaqtastyǵyna, sondaı-aq áskerı qyzmetshilerdiń jaýyngerlik daıarlyq jáne kásibı sheberlik deńgeıiniń artýyna oń áser etedi.
«Armııalyq halyqaralyq oıyndardy ótkizý shynaıy jaýyngerlik baýyrlastyq pen adamı dostyqtyń negizi bolyp tabylady jáne Elbasy – Qazaqstan Respýblıkasy Qarýly Kúshteriniń Joǵarǵy Bas qolbasshysy tarapynan laıyqty qoldaý taýyp keledi. Armııalyq oıyndar kólemdi álemdik sporttyq birinshilikterden esh aıyrmasy joq, halyqaralyq aýqymdaǵy keremet is-shara. Biz úshin ony eń joǵary deńgeıde Qazaqstanda ótkizý úlken abyroı», — dedi QR Qorǵanys mınıstri general-polkovnık S. Jasuzaqov.
Armııalyq halyqaralyq oıyndardyń ashylý baǵdarlamasyna sáıkes, qazaqstandyq barabanshylar men dombyrashylar jáne qazirgi zamanǵy jaýyngerlik tehnıkanyń («Arlan» brondy-dóńgelekti mashınalary, «T-72 B» tankteri) súıemeldeýimen QR QM áskerı orkestri óner kórsetti. Desantshylar rotasynyń oryndaýynda kópshilikke qarýmen qol jekpe-jegi urysynyń kórsetilimi usynyldy. Qazaqstan áskeriniń jaýyngerlik ushaqtary men tikkushaqtary pılotajdyq tobynyń áýe shoýy armııalyq oıyndardyń ashylýynyń sharyqtaý shegi bolǵanyn atap ótý kerek. Armııalyq halyqaralyq oıyndar sheńberindegi «Artıllerııalyq atys sheberi», «Mergendik shebi» jáne «Ushqyshsyz ushý apparattary eseptoptarynyń jarysy» baıqaýlary Qazaqstanda 1-9 tamyz aralyǵynda ótedi.