Bul bastama qazaq sportynyń alǵa qaraı jyljýy úshin jasalǵan mańyzdy qadam bolmaq. Búgin «Saryarqa» velotreginde sporttyq oq atý federasııasy qoǵamdyq birlestiginiń kezekten tys eseptik saılaý konferensııasy ótti.
Alqaly jıynda federasııanyń esep berý kezeńinde atqarylǵan jumystary tyńdaldy. Oǵan Mádenıet jáne sport mınıstri Arystanbek Muhamedıuly qatysty. Budan bólek, jıyn barysynda federasııanyń jańa quramy bekitildi.
Basqosýda daýys berýshilerdiń biraýyzdan shyǵarǵan sheshimi boıynsha Qazaqstannyń sporttyq atý federasııasyna basshy bolyp Arystanbek Muhamedıuly saılandy. Sonymen qatar, federasııanyń atqarýshy komıteti bekitildi. Atqarýshy komıtettiń tóraǵalyq etýshisi, federasııanyń bas hatshysy laýazymyna Oleg Pochıvalov, vıse-prezıdent qyzmetterine Nurlan Orazalıev pen Anvar Iýnýsmetov, atqarýshy dırektory bolyp Oksana Sereda, stendtik atý boıynsha atqarýshy dırektoryna Tatıana Davydova, myltyq atý boıynsha atqarýshy dırektory bolyp Tatıana Tabakaeva saılandy.
Jıynda sóz alǵan Arystanbek Muhamedıuly sporttyq atý elimizdegi negizgi Olımpıadalyq sport túri ekendigin erekshe atap ótti.
– Qurmetti, jınalǵan qaýym, maǵan úmit artyp, osy mindetti senip tapsyrǵandaryńyzǵa alǵysym sheksiz. Shyny kerek, elimizde sport kúnnen kúnge damyp barady. Oǵan dálel retinde sońǵy Olımpıada oıyndaryn alýyma bolady. Brazılııada jampozdarymyz 17 medal jeńip, Qazaqstan tarıhyndaǵy eń joǵarǵy kórsetkishti jasady. Bul bizdiń sportqa degen kózqarasymyzdyń, baǵytymyzdyń aıqyn ekendigin bildiredi, – dedi Mádenıet jáne sport mınıstri.
Ol sondaı-aq, birer jyl buryn elimizde sporttyń bir túrinen birneshe federasııa bolǵanyn, alaıda halyqaralyq talaptarǵa sáıkes, olardyń arnaıy tirkeýlerden keıin biriktirilgenin de eske salyp ótti.
Budan bólek, mınıstr qazirgi ýaqyttaǵy basty maqsat otandyq sportshylardyń nátıjelerin jetildirý jáne Olımpıada oıyndaryna lısenzııa utyp alý ekenin aıta kele, álemdik qaýymdastyqta úlken nátıjelerge jetip, aldaǵy Olımpıa oıyndarynda aıtýly jetistikterge qol jetkizetindigine senimin bildirdi. Ol sporttyq atý federasııasynyń 2016 jylǵy qyzmeti, ıaǵnı ulttyq qurama komandalardyń daıyndyǵy, óńirlerdegi sport túrin damytý, respýblıkalyq jáne halyqaralyq deńgeıdegi birqatar sport sharalaryn uıymdastyrýda, sondaı-aq, buqaralyq sportty damytýdaǵy jumysy jemisti bolǵanyn málimdedi.
– Búgin mańyzdy jıyn ótti. Sporttyq oq atý federasııasyna jańa basshy saılandy. О́zderińiz bilesizder, bul sport túrinde kóbirek medal sarapqa salynady. Aldaǵy ýaqytta osy salanyń deńgeıi burynǵysynan da kóterilip, qyzyǵýshylyq tanytqan jastarymyzdyń da qatary arta túsedi dep úmittenemin. Taǵy bir aıta keterim, birer kúnnen keıin Astanada atý sport túrlerine arnalǵan keshen ashylady. Onyń da jastarymyz úshin paıdasy zor bolmaq, – dedi Sport jáne dene shynyqtyrý isteri komıtetiniń tóraǵasy Elsııar Qanaǵatov.
Aıta keteıik, búginde atý sport túri boıynsha elimizde 2 myńǵa jýyq adam qyzmet etedi.
Aıan ÁBDÝÁLI, «Egemen Qazaqstan»