Oblys ákimi baspasóz qyzmetiniń habarlaýynsha, óńir basshysy gaz quıý beketteriniń basshylarynan qansha kólemde suıytylǵan otyndy alyp otyrǵanyn, ol qalaı jumsalyp jatqandyǵyn surady.
Reıd barysynda keıbir gaz quıý beketterinniń qajetti qujattary joq ekeni anyqtaldy. Sondyqtan, óńir basshysy salyq komıtetine barlyq gaz quıý beketterine arnaıy tekseris jasaýyn tapsyrdy. Reıd barysynda Eraly Toǵjanov kólik júrgizýshilerimen tildesip, olardyń jan-aıqaıyn tyńdady. Bul másele jaqyn arada sheshiletinin, sabyrlyq pen ýaqyt qajet ekenin jetkizdi.
Máseleni túbegeıli sheshý úshin barlyq jeke gaz quıý beketterine tekseris júrgizý qajet. Sol sebepti, óńir basshysy memlekettik kirister departamentine gaz quıý beketteriniń ótken jylǵy jáne bıylǵy qujattaryn tolyq tekserýin tapsyrdy.
Aıta keteıik, kógildir otyndy gaz quıý beketterine jetkizetin kólikter tolyqtaı GPS qondyrǵysymen jabdyqtalǵan. Al, ony Mańǵystaý oblystyq Ishki ister departamenti baqylaýda ustap otyr.
Gaz máselesin sheshý úshin óńir basshysy búgin Aqtaý qalasyna qosymsha 60 tonna gaz beriletinin málimdedi. Kógildir otyn barlyq gaz quıý beketterine bólinip, jetkiziledi.
Sonymen qatar, gaz quıý beketterine tekseris barysynda oblys basshysy Aqtaý qalasynyń ákimi Serikbaı Trumovqa - eskertý, qala ákiminiń orynbasary Tilek Qoshmaǵambetovke - sógis berdi. Janar-jaǵarmaı beketterin sholyp shyqqan oblys ákimi bul másele bir izge túskenin jeke ózi qadaǵalaıtynyn jáne jaqyn kúnderi sheshiletinin aıtty.