Qazaqstan – aımaqtaǵy turaqtandyrýshy kúsh

Keshe Memleket basshysy Nursultan Nazarbaev Eýropa Keńesiniń Bas hatshysy Týrborn Iаglandty qabyldady, dep habarlady Qazaqstan Respýblıkasy Prezıdentiniń baspasóz qyzmeti. Memleket basshysy kezdesý Iаdrosyz álem úshin halyqaralyq forýmy qarsańynda ótip jat­qa­nyn atap ótti. Qazaqstan úshin bul – óte mańyzdy oqıǵa. Prezıdent Qazaqstannyń polıgondy jap­qan jáne ıadrolyq qarýdan bas tartqan memleket retinde osyn­daı forým ótkizýge moral­dyq quqyǵy baryn atap kórsetti. Taıaýda BUU Bas Assambleıa­sy­nyń sessııasynda sóılegen sózin­de Memleket basshysy ıadrosyz álem úshin jahandyq qozǵalysty bekitý týraly ıdeıa aıtqan edi. T.Iаgland ózi úshin Qazaqstanda bolǵany úlken qurmet ekenine toqtalyp ótti. Eýropa Keńesiniń Bas hatshysy jeke ózi jáne Eý­ro­padaǵy kóptegen adamdar eli­miz­diń aımaqtaǵy turaqtandyrýshy kúsh retindegi rólin joǵary ba­ǵa­laıtynyn atap ótti. Qazaqstan kóptegen etnostyq top birge beıbitshilik pen kelisimde ómir súrip jatqanynyń úlgisi bolyp tabylady. Eýropa Keńesiniń Bas hat­shy­sy Qazaqstannyń óz erkimen, bir jaqty tártippen ıadrolyq arse­nal­dy paıdalanýdan bas tartýy tarıhı mánge ıe, mańyzdy qadam bolyp tabylatynyn atap kór­set­ti. Bul bastama, ásirese, álemdi ıad­rolyq qarýdan azat etý jó­nindegi jahandyq naýqan aıasynda óte mańyzdy. T.Iаgland Qazaq­stan ıadrolyq qarýsyzdaný jáne taratpaý jalpyálemdik úderisinde ózi­niń belsendi qyzmetin jal­ǵas­ty­ra beretinine senimin bildirdi. T.Iаgland Qazaqstan tańda­nar­lyq tabystarǵa qol jetkizip, aı­maqta ǵana emes, sonymen birge, álemdik arenada da belgili serpindi memleketke aınalǵanyn atap ótti. Kezdesýde sondaı-aq Qazaq­stan­nyń Eýropa Keńesimen yn­ty­maqtastyq perspektıvalary, Eýropalyq Keńes elderiniń kon­ve­nsııasyna qosylý jáne Eýro­pa­l­­yq Odaqpen qarym-qatyna­syn nyǵaıtý týraly máseleler talqylandy. ----------------------------------------- Sýretti túsirgender S.BONDARENKO, B.OTARBAEV.