Endi mine, óńirdiń aýdan ortalyqtarynda da osyndaı sýburqaqtar iske qosylyp, jurt baratyn demalys oryndarynyń qatary kóbeıip keledi. Jaqynda osyndaı túrli-tústi sýburqaq Jarma aýdanynyń ortalyǵy – Qalbataý aýylyndaǵy ortalyq alańda eldi meken turǵyndarynyń, jastardyń qatysýymen saltanatty túrde ashyldy. Aýyldaǵy aǵaıynnyń kóńilin serpiltken sharaǵa aýdan ákimi Nurlan Sydyqov ta arnaıy qatysyp, eldi mekenge erekshe kórik bergen sýburqaqty jurtpen birge tamashalady.
«Aýylymyzdyń kórkin kirgizip, ajaryna ajar qosqan bul nysan jergilikti turǵyndarǵa ǵana emes, aýdanǵa keletin qonaqtarǵa da erekshe áser syılaıdy dep oılaımyz. Ásirese, biz sekildi jastar úshin aýdanymyzda osyndaı demalys oryndarynyń kóp bolǵany qýantady», dedi sýburqaqtyń ashylý saltanatynda jastar atynan sóz alǵan «Jas Otan» Jastar qanatynyń belsendi múshesi Mahabbat Sanat.
Áýendi sýburqaq eki tostaǵannan turady. Úlkeniniń dıametri 20 metrdi quraıdy. 200 sý búrikkishten turatyn sýburqaq 12 metr bıiktikke deıin sý shashatyn kórinedi.
Azamat QASYM, «Egemen Qazaqstan»
Shyǵys Qazaqstan oblysy, Jarma aýdany