Kórshieldiń ınvestorlary bıoetanol óndirisine Otyrar aýdanyn, al fosfor qaldyqtaryn óńdeýde Sozaq óńirin qolaıly kórip otyr. Búgin bul týraly Ońtústik Qazaqstan oblysynyń ákimi men Qytaı ftorselıkondyq óndirisi assosıasııasynyń dırektory Sıanjýn Sao myrza bastaǵan delegasııanyń kezdesýinde málim boldy.
О́ńir basshysy sheteldik ınvestorlarǵa oblysymyzdyń ınvestısııalyq tartymdylyǵy men ındýstrıaldy-ınnovasııalyq jobalardy iske asyratyn aımaqtardyń áleýetin baıandady. Oblys ekonomıkasyn órge súırep kele jatqan salalarǵa toqtalǵan ákim ınvestısııa tartý boıynsha jergilikti bılik tarapynan kórsetiletin jeńildikter men múmkindikterge keńinen toqtaldy.
«Elge ınvestısııa tartý – ekonomıkanyń eń negizgi tetigi. Osyny eskere otyryp biz kásipkerlerge barynsha qoldaý bildirip otyrmyz. О́ńirimizde 11 ındýstrıaldyq 1 arnaıy ekonomıkalyq aımaǵymyz jumys isteıdi. Sheteldik ınvestorlar kedendik, múliktik salyqtardan bosatylady. Sondaı-aq jer telimi, ınfraqurylymdyq qajettilikterdiń bárimen tolyq qamtamasyz etetin bolamyz», - dedi Janseıit Qanseıituly.
Kezdesý barysynda qytaılyq delegasııany bastap kelgen Sıanjýn Sao myrza negizgi eki baǵytta zaýyt qurylysyn bastaýǵa múddeli ekendikterin jetkizdi. Osy rette sheteldik ınvestorlardy ońtústik óńirine arnaıy shaqyrtqan elimizge belgili kásipker Serikjan Seıtjanovtyń da eńbegin atap ótken jón.
«Biz Ońtústik Qazaqstan oblysynda negizgi eki baǵytty damytýdy josparlap otyrmyz. Onyń biri – bıoetanol óndirý isi, al ekinshisi fosfor qaldyqtaryn qaıta óńdeýden ótkizý. Eger ekijaqty kelisimder oryndalyp jatsa, eki zaýyttyń qurylysyn tezarada bastaýdy jón kórip otyrmyz», - dedi Sıanjýn Sao myrza.
Aıta keteıik, búgingi tańda álemde bıoetanol óndirisiniń órisi keńip, paıdalanýshylar qatary artyp keledi. Ǵylym tilimen aıtsaq, bıoetanol degenimiz tehnıkalyq absolıýttendirilgen spırt quramy 99,9 gradýsty quraıdy. Atalmysh jańa otyn túri janar-jaǵar maıǵa qaraǵanda, aýany lastamaıdy jáne parnıktik gazdardy da bólmeıdi. Bir sózben aıtqanda adamzat balasyna da, qorshaǵan ortaǵa da zııansyz otyn. Qytaılyq ınvestorlar bıoetanol óndirý isinde ońtústikqazaqstandyq júgeri men bıdaı, arpa qaldyqtaryn paıdalanbaq. Bul óz kezeginde Ońtústik Qazaqstan oblysynyń aýyl sharýashylyq salasyn damytýdyń erekshe joly bolmaq.
Sheteldik ınvestorlardyń eki jobasyna da qoldaý bildirgen Janseıit Qanseıituly tıisti basqarma basshylaryna naqty tapsyrmalar júktedi. Tıisti qujattardy tezdetip ázirlep, qajetti jer telimderin bólýdi jáne de eki zaýyttyń da irgetasyn bıyl qalaýdy tapsyrdy.