Olardyń ishinde óte tanymal sadaqshylar bar. Mysaly, «Altyn jebe» týrnırine qatysýǵa Túrkııadan kelgen Býnchýkký Murat at ústinen sadaq atýdan dańqy shyqqan mergen. Murat mergen 2015 jyly «Altyn oq» halyqaralyq týrnırinde at ústinen sadaq atý básekesinde 1-shi oryn ıelengen. 2015 jylǵy halyaralyq jarystarda koreı stılinde, jalpy klassıkalyq stılde ulttyq sadaq atýda birneshe dúrkin jeńimpaz atanǵan. 2016 jyly ótken halyqaralyq jarystyń birinde 1-shi oryn, taǵy bir jarystarda 2-shi jáne 3-shi oryn ıelengen. 2017 jyly eki iri halyqaralyq týrnırde at ústinen sadaq atýdan eki márte 2-shi oryndy jeńip alǵan.
Túrkııa demekshi, búgingi tańda etnıkalyq sadaq atý sportyn dúnıejúzilik deńgeıge kóterip, damytyp otyrǵan memlekettiń biri – Túrkııa. Túrkııada eń kóp ótetin jarystyń túri osy ulttyq sadaq atý jarystary eken. Kóptegen iri qalalarynda tek sadaq atýǵa arnalǵan stadıondar salynǵan. Apta saıyn ulttyq sadaq atýdan birneshe iri jarystar uıymdastyrylyp turady.
Sonymen qatar, Mońǵolııanyń at ústinde sadaq atýdan tanylǵan úzdik mergeni Dýnchıg Otgonbıamba kelip otyr. Dýnchıg – Mońǵolııa chempıonatynyń birneshe dúrkin júldegeri, 2017 jyly ótken Monǵolııa chempıonatynyń jeńimpazy. Kóptegen halyqaralyq jarystardyń qatysýshysy. 2014 jyly Japonııada ótken halyqaralyq jarysta qola júldeni, 2015 jyly Vengrııada ótken halyqaralyq jarysta kúmis júldeni jeńip alǵan. 2016 jyly Qazaqstanda ótken A.Asqarov atyndaǵy halyqaralyq týrnırde Jamby atýdan qola júldeger atanǵan.
Túrkııa sekildi Mońǵolııa eli de ulttyq sadaq atýdy urpaqtan urpaqqa jalǵap kele jatqan jurt. Bul elde eńbektegen baladan eńkeıgen kárige deıin ulttyq sadaq atady desek, ótirik emes. Mońǵol halqy balýan men mergendi qatty qurmetteıdi. Sadaq atý men kúresten chempıon atanǵan sportshynyń ulttyq bas kıiminde arnaıy belgi taǵylady. Osy chempıondyq belgisi bar bas kıimmen sportshy laýazymdy memlekettik qyzmetkerdiń aldyna barsa, laýazymdy qyzmetker sportshynyń máselesin dereý sheship berýge mindetti. Mońǵolııa ulttyq sporttaǵy sańlaqtaryn osyndaı dárejede qurmetteıdi.
Dýnchıg Otgonbıambamen birge «Altyn jebe» týrnırinde Monǵolııanyń mergen qyzy – Baatarchýlýýn Gerelchýlýýn da baq synap kórmekshi. О́z elinde quralaıdy kózge atqan sańlaqtar qatarynda turǵan 23 jasar Gerelchýlýýn qyz ulttyq sadaq atý jarystarynan jeńip alǵan júldeleri sanyna jankúıerleriniń ózi jıi jańylyp jatady eken.
Jamby jarysynyń jankúıerleri Polshanyń ataqty mergeni Radoslav Kozýchtyń ónerin tamashalaıtyn bolady. Radoslav – 2014-2015-2016 jyldary Polsha qurama komanda quramynda Eýropa Gran-prı básekesinde 1-shi oryndy jeńip alǵan. 2017 jyly Majarstannyń Pomaz qalasynda ótken Eýropa Gran-prı básekesinde koreı stılinde atýdan 2-shi oryn ıelengen. 2017 jyly Túrkııada ótken «Altyn oq» festıvalinde 5-shi oryn alǵan. Sondaı-aq, ol Túrkııa, Vengrııa, Shvesııa, Fransııa, Germanııa elderinde uıymdastyrylǵan kóptegen halyqaralyq jarystarǵa qatysyp, júldeger atanǵan.
Eldi eleńdetken erekshe saıys12-13 tamyz kúnderi Astanadaǵy «Qazanat» atshabarynda ótedi.