Birer apta buryn Otar 40-shy áskerı bazasynda «ArMI-2017» halyqaralyq áskerı oıyndardyń ashylý saltanaty bolyp ótken edi. Qazaqstan aýmaǵynda mundaı joǵary deńgeıdegi armııa oıyndary ekinshi ret ótkizilip otyr. On kúnge jýyq sozylatyn saıysta bıyl 18 memleketten quralǵan komandalar, ıaǵnı 400-ge jýyq áskerı qyzmetker ózara synǵa túsedi.
Aptanyń sońǵy kúninde ár komandanyń basshylary elorda tórindegi jahandyq kórmege arnaıy qonaq retinde shaqyryldy. Olar eń aldymen "Nur Álem" pavılonyn aralady. Segiz qabatty ǵımarattan shyqqannan keıin tańdanystaryn jasyra almady. Qytaı eliniń ókili Van Tıe Fen ózin beıne bir ózge álemge nemese bolashaqqa enip ketkendeı kúıde qalǵanyn, ótken tarıhqa da bir saıahattap qaıtqanyn aıtty. Sondaı-aq, ár qabattyń ózindik syrlary baryn, solar arqyly óskeleń urpaqtyń qandaı zamanda kún keshetindigin bilýge bolatynyn málimdedi.
Aıta keteıik, 1-9 tamyz kúnderi ArMI-2017 oıyny barysynda "Artıllerııalyq atys sheberi", "Mergendik shebi" jáne "Ushqyshsyz ushý apparattary eseptoptarynyń jarysy" baıqaýlary ótken bolatyn. Al saltanatty ashylý rásimi kezinde desantshylar rotasynyń qarýmen qol jekpe-jegi, budan bólek Qazaqstan áskerı ushaqtary men tikushaqtary pılotajdyq tobynyń áýe shoýy syndy ózge de áskerı qoıylymdar kórsetilgen bolatyn.
Esterińizge sala keteıik, EKSPO ulttyq kompanııasynyń sharaǵa 2 mln qonaq keletinin, onyń 15 paıyzy sheteldik bolatynyn habarlaǵan bolatyn.
Aıan ÁBDÝÁLI, "Egemen Qazaqstan"