− Bul kúnderi teatrlardyń kúndelikti ómiri máselesin qarap jatqan bıýdjettik komıssııa múshelerinde salaǵa qatysty birqatar suraqtar týyndaýda. Elordalyq teatrlardyń materıaldyq-tehnıkalyq bazasynan bastap shyǵarmashylyq deńgeıi, óner ujymdary men ártisterdiń halyq arasyndaǵy tanymaldylyǵy, jalpy alǵanda olardyń qazaqstandyq sahna ónerindegi orny qandaı degen másele aldymyzdan shyqty, –dedi Ermek Amanshaev.
Qala ákiminiń orynbasary Elbasynyń «Bolashaqqa baǵdar: rýhanı jańǵyrý» maqalasyna toqtalyp, osy oraıda elordalyq teatrlardyń da atalmysh baǵdarlamaǵa úles qosý kerektigin aıtyp ótti. Alda kele jatqan Astananyń 20 jyldyq mereıtoıyna teatrlar qazirden daıyndalý kerektigin jetkizdi. Qalalyq Mádenıet, muraǵattar jáne qujattama basqarmasynyń teatrlarmen jumysyn shıratý qajettigine nazar aýdardy. Bul oraıda «Elorda mádenıeti» baǵdarlamasy aıasynda júzege asýy tıis sharýalarǵa toqtaldy.
Jıynda M.Gorkıı atyndaǵy memlekettik akademııalyq Orys drama teatrynyń dırektory Erkin Qasenov, Q.Qýanyshbaev atyndaǵy memlekettik akademııalyq Qazaq mýzykalyq drama teatrynyń dırektory Aıbolat Seksenbaev, «Jastar» teatrynyń dırektory Ernar Jumataev pen kórkemdik jetekshisi Nurqanat Jaqypbaı, «Naz» memlekettik bı teatrynyń dırektory Sultan Sraıyl, Qýyrshaqtar teatrynyń dırektory Toǵjan Hasanǵalıeva teatrlardyń tynys-tirshiligimen, túıtkildi máselelerimen tanystyrdy.
Aıgúl SEIIL,
«Egemen Qazaqstan»