Memleket basshysy Nursultan Nazarbaev Qazaqstannyń halyq jazýshysy, kórnekti aqyn Tumanbaı Moldaǵalıevtiń qaıtys bolýyna baılanysty marqumnyń otbasy men týǵan-týystaryna kóńil aıtý jedelhatyn joldady, dep habarlady Qazaqstan Respýblıkasy Prezıdentiniń baspasóz qyzmeti.
«Halqymyzdyń asa kórnekti aqyny, Memlekettik syılyqtyń laýreaty Tumanbaı Moldaǵalıev aǵamyzdyń ómirden ótýine baılanysty aýyr qaıǵylaryńyzǵa ortaqtasyp, kóńil aıtamyn.
Qazaq eli «Tumash» dep erkeletken ardaqty azamat, ulttyq poezııamyzdyń órkendeýine ólsheýsiz úles qosqan jyr alyptarynyń úrkerdeı tobyna jatatyn sanaýly qaıratkerlerdiń biri edi.
Sezim men názik lırıkanyń teńdessiz sheberi Tumaǵańnyń óleńderi kóptegen júrekke óshpesteı jol salǵany shúbásiz. Jan-dúnıeńdi úıirip, rýhyńdy asqaqtata biletin shynshyl da tákappar poezııasy bul kúnde ulttyq mádenıetimizdiń altyn qoryna, halqymyzdyń rýhanı baılyǵyna aınaldy.
Qalamgerdiń ónegeli ómiri, jarqyn beınesi, ǵıbraty mol ómirsheń óleńderi óshpeıdi dep bilemin.
Marqumnyń jatqan jeri jaryq bolyp, nurly da móldir jany peıishte shalqysyn demekpin», delingen jedelhatta.