Qazirgi kezde balalardyń kóbi shetelderdiń mýltfılmin orys tilinde, ne qazaqsha aýdarma arqyly tamashalaıtyny jasyryn emes. Bul elimizde balalarǵa arnalǵan rýhanı azyqtyń azdyǵynan habar beretin jaǵdaı. Áıtpese, qazirgi kúni jeke stýdııalarda da qazaq tilindegi jap-jaqsy mýltfılmder túsirilip jatqanyn bárimiz bilemiz. Biraq, balalarǵa arnalǵan jalǵyz «Balapan» arnasynyń ózine ol ónimder jetkiliksiz. Sol úshin qazaq tilinde mýltfılm túsirildi degen habardyń ózi qulaqqa jyly estiledi. Al myna baıqaý alda túsirilýi tıis jaqsy dúnıelerden úmittendiredi eken. Birinshiden, bul jetkinshekterdiń arasynda uıymdastyrylýda. Balanyń qııaly úlkenderdikinen keminde bes ese artyq bolýy múmkin. Iаǵnı, bolashaqta ómirge tamasha mýltfılmder kelip jatsa nur ústine nur. Ekinshiden, qazaq anımasııasynyń elý jyldyǵyna oraı uıymdastyrylyp jatqan baıqaý aldymen Ulttyq ónimderi nasıhattaýdy maqsat etedi. Qazaqshalap aıtqanda qazaqy boıaýdyń qalyń bolmaǵy jón.
Baıqaý týraly aıta keter bolsaq, jas sýretshiler «Men jaqsy kóretin qazaq mýltfılmi» jáne «Meniń qııalymdaǵy keıipker» atty atalymdar boıynsha óner jarystyrmaq. Alǵashqy atalym boıynsha balalar qazaq mýltfılmderi jelisinde salynǵan sýretter men komıkster jiberetin bolsa, ekinshi atalymda olardyń qııalyna erkindik beriledi. Ertegi, ańyz ne mıftik keıipkerlerdi óz qalaýynsha salyp, baıqaýǵa jiberýge bolady. Biraq, sheteldik mýltfılmderdiń keıipkerleri qabyldanbaq emes. Baıqaýǵa elimizdiń barlyq oqýshylary qatysa alady. Eńbekter 15 qazanǵa deıin qabyldanyp, 24 qazan kúni respýblıkalyq «Ulan» gazetinde qorytyndysy jarııalanbaq. Úzdik jumystardyń barlyǵy «Jas órken» seriktestigine kiretin gazet-jýrnaldarda jarııalanady.
Aıgúl SEIIL, «Egemen Qazaqstan»