Qazaqstan Respýblıkasy Parlamenti Májilisiniń Tóraǵasy Oral Muhamedjanov Parlamentshiler ıadrolyq qarýdy taratpaý jáne qarýsyzdandyrý úshin parlamenttik birlestiktiń bas hatshysy Elın Ýeıerdi qabyldady, dep habarlady osy palatanyń baspasóz qyzmeti.
Palata Tóraǵasy meımanǵa Iаdrolyq qarýsyz álem úshin halyqaralyq forýmnyń jumysyna qatysýǵa kelgeni úshin rızashylyǵyn bildirdi. Sizdiń uıymnyń maqsaty ıadrolyq qarýdy taratpaý jáne qarýsyzdaný jónindegi ortaq múddege álem parlamentshilerin biriktirýge baǵyttalǵan. HHI ǵasyr ıadrolyq qarýsyz ǵasyr bolýy – barshamyzdyń ortaq maqsatymyz, – dedi O.Muhamedjanov. Qazaqstan – beıbitshilik pen qaýipsizdik maqsatyn ustanǵan memleket. Qazaqstan Respýblıkasynyń Tuńǵysh Prezıdenti Nursultan Nazarbaevtyń 1991 jyly 29 tamyz kúni «Semeı ıadrolyq synaq polıgonyn jabý týraly» Jarlyqqa qol qoıýy mańyzdy qadam boldy. Sodan keıin Qazaqstan ıadrolyq qarýsyzdanýǵa qatysty barlyq basty qujattarǵa qol qoıdy.
Májilis Tóraǵasy álemde apatty qarýǵa qarsy málimdemeler, deklarasııalar kóp bolǵanyn, alaıda, Qazaqstan dúnıe júzi boıynsha ıadrolyq qarýdan bas tartqan birinshi memleket ekenin aıtty. Semeı synaq aımaǵynda 40 jyl ishinde 456 ıadrolyq synaq jasalǵan. Sonyń zalalynan bir jarym mln adam zardap shekti. 304 myń sharshy kılometr jer ýlandy. Osyndaı apatty bastan keshken Qazaq eli ıadrolyq qarýdyń qandaı tajal ekenin jaqsy biledi. 2006 jyly Qazaqstan, Qyrǵyz Respýblıkasy, Tájikstan, Túrkimenstan jáne О́zbekstan ıadrolyq qarýdan azat Ortalyq Azııa aımaǵyn qurý týraly kelisimge qol qoıdy, dedi Májilis Tóraǵasy.
O.Muhamedjanov sondaı-aq 2009 jyly Qazaqstan Prezıdenti Nursultan Nazarbaevtyń bastamasymen BUU Bas Assambleıasy 29 tamyzdy Iаdrolyq synaqtarǵa qarsy is-qımyldyń halyqaralyq kúni dep jarııalaý týraly qarar qabyldaǵanyn jetkizdi. 2010 jyly sáýir aıynda Vashıngton qalasynda ıadrolyq qaýipsizdik jónindegi jahandyq Sammıtte Prezıdent N.Nazarbaev ıadrolyq qarýsyz álem deklarasııasyn ázirleý qajettigi jóninde usynys jasady. 2011 jyly qyrkúıekte BUU Bas Assambleıasynyń 66-shy sessııasynda sóılegen sózinde Qazaqstan Respýblıkasynyń Prezıdenti osy bastamasyn taǵy da jarııa etti, dedi O.Muhamedjanov.
Májilis Tóraǵasy meımanǵa bıyl el Táýelsizdiginiń 20 jyldyǵy atalyp ótetinin, osy kezeń ishinde Prezıdent N. Nazarbaevtyń syndarly saıasatynyń arqasynda Qazaqstan jańa memleket pen demokratııalyq ınstıtýttardy qalyptastyrýda, ulttararalyq jáne dinderaralyq kelisimdi saqtaýda aıtarlyqtaı jetistikke qol jetkizgenin málim etti. Qazaqstan halqy Assambleıasy qurylǵanyn, elimizde 140-tan astam ult pen ulys, 40 shaqty dinı uıymdar ókilderi beıbit turyp jatqany málimdeldi.
Elın Ýeıer óz kezeginde ıadorlyq qarýsyzdaný isinde Qazaqstannyń úlken tájirıbesi bar ekenin aıtty. Meıman ózi jetekshilik etetin uıymnyń atqaryp jatqan qyzmetterine toqtaldy. Uıym búgingi tańda álemniń 75 elinen 800-den astam parlamentshini biriktirip otyr. Astanadaǵy forým yntymaqtastyq baılanysty damyta túsetinine senimdimin, dedi meıman.