Shara 19 tamyzǵa josparlanǵan. MMA, dzıýdo, sambo, jaýyngerlik sambo, taekvondo, jekpe-jek, WKF karate, boks, kıkboksıng, taı boksy, pankrıatıon, grek-rım kúresi, djıý djıtsý, kıokýshınkaı karate, erkin kúres jəne basqa da jekpe-jektiń 16 túrinen bolatyn jarysta Atyraý oblysynyń eń úzdik sportshylary alys-jaqyn shetelderden keletin qarsylastarymen synǵa túsedi.
Munaıly aımaqqa Ýkraına, Reseı, Grýzııa, Əzerbaıjan, Brazılııa, Koreıa, Túrkııa, Ispanııa, Taıland, Polsha, Belgııa, Iran, Marokko elderinen, barlyǵy 16 memleketten sportshylar keledi.
Sharany uıymdastyrýshy, oblystyq dene tərbıesi jəne sport basqarmasynyń basshysy Azamat Bekettiń aıtýynsha, sport festıvali aımaqtaǵy sportty nasıhattap, salaýatty ómir saltyn qamtamasyz etýge baǵyttalǵan.
-«Atyrau Sport Fest 2017» aıasynda kórermen bir keshte jekpe-jektiń barlyq túrin tamashalaı alady. Festıval qonaqtary úshin MMA boıynsha jarys keshin daıyndap otyrmyz – brazılııalyq sportshy Fortýnato Lap atyraýlyq belgili sport sańlaǵy Isataı Temirovpen jekpe-jekke shyǵady. Mundaı formattaǵy shara bizdiń elimizde buryn-sońdy bolmaǵan. Festıvaldi jyl saıyn dəstúrli túrde ótkizbek nıettemiz. Kelesi jyly Atyraýda sporttyq oıyn túrleri festıvali ótedi,- deıdi Azamat Beket.
Kesh baǵdarlamasynda otandyq jəne sheteldik estrada juldyzdarynyń konserti de bar. Kórermen lazerli shoýmen birge Atyraý oblysyndaǵy jas sportshylardyń ónerine kýə bolady.
Baqytgúl Babash,
"Egemen Qazaqstan"