Alaıda, sol jas býynǵa keleshektiń kiltin qalaı tabystaımyz, olardy óz bolashaǵyna jaýapty etip tárbıeleýdiń tetigi qandaı? Jalpy, qazirgi jasóspirim el bolashaǵyna qanshalyqty senimdi? Keleshek kókjıegine kóz jibergende, neni kórgendeı? Mine, «Men jáne meniń Qazaqstanym 2025 jyly» atty respýblıkalyq baıqaýdy uıymdastyrýdyń negizgi kózdegeni de osy saýaldardyń jaýabyn olardyń ózimen birlese otyryp izdep kórý edi. Baıqaý qorytyndysynda iriktelgen shyǵarmalar sapasy men oı-tolǵam óresi elimizde keleshektiń enshisindegi ózekti máselelerge beıjaı qaramaıtyn, eljandy, otansúıgish, sanaly jastardyń ósip kele jatqanyn alǵa tartty.
Jalpy bilim beretin mektepterdiń 5-9 synyp oqýshylary arasynda ótkizilgen «Men jáne meniń Qazaqstanym 2025 jyly» atty respýblıkalyq baıqaýdyń jeńimpazdaryn keshe Ulttyq ekonomıka mınıstri Tımýr Súleımenov marapattady. Shara Ulttyq ekonomıka, Bilim jáne ǵylym mınıstrlikteriniń qoldaýymen uıymdastyrylǵan. Baıqaý sharty boıynsha, oqýshylar 2025 jyly Qazaqstandy qalaı elestetini týraly oı-tolǵamdaryn jazǵan. Oǵan Qazaqstannyń barlyq aımaqtarynan qazaq, aǵylshyn jáne orys tilderinde 100-den asa shyǵarma (esse) usynylyp, olardyń ishinen eń úzdik 27 jumys tańdalyp alynǵan. Júldege ıe bolǵan 10 oqýshyǵa Ulttyq ekonomıka mınıstri alǵys hat pen EKSPO-2017 halyqaralyq kórmesiniń bıletin tabys etti. Mınıstrdiń qolynan marapat alǵandardyń qatarynda Almatydan kelgen Álı Hasen, Gúlnaz Moldash, Astanadan Dana Ospanova men Ádııa Babajanova, Qyzylorda oblysynan Arýjan Qonysbekova, О́skemennen Zere Maratova, Pavlodardan Sofııa Nurekenova bar. Aqtyq saıysqa shyqqan 17 oqýshy estelik maqtaý qaǵazdaryn ıelendi.
Qazaqstannyń bolashaǵyn jas urpaqtyń kózimen kórý aǵa býynǵa mańyzdy. Baıqaýdy ótkizý týraly ıdeıa da osy sebepten týyndaǵan. Tımýr Súleımenovtiń aıtýynsha, shyǵarmalarda kezdesken qyzyqty ári mańyzdy usynystar elimizde ázirlenip jatqan Qazaqstannyń 2025 jylǵy Strategııalyq damý josparynda eskeriletin bolady. Sonymen qatar, mınıstr qazirgi ýaqytta atalǵan qujatty saraptama jáne bıznes-birlestikterdiń ókilderi zerttep jatqanyn jetkizdi. Mınıstr baıqaýdan shet qalmaı, belsendilik tanytqan oqýshylarǵa alǵysyn bildirdi.
Jeńimpazdar da bul sharanyń qorytyndysy osylaı mınıstrlik deńgeıinde ótkizilip, Astanaǵa shaqyrylyp, ózderine bala demeı, aıryqsha kóńil bólinip jatqanyna rızashylyqtaryn jasyrmady. Bul óz kezeginde, jastardyń elge degen súıispenshiligin arttyryp, aǵa býyn aldyndaǵy jaýapkershiligin eseleı túsetinin aıtty.
Baıqaýǵa qatysqan ár oqýshy elimizde bolyp jatqan oqıǵalardy saraptap, ózderiniń tyń ıdeıalarymen bólisken. «Baıqaý bolatynyn estigen kezde birneshe kún boıy oıymdy júıelep júrdim. Odan keıin oı-tolǵaýymdy qaǵazǵa túsirip kórgenimde muǵalimime qatty unady. EKSPO-2017 kórmesin tamashalaýǵa múmkindik alǵanyma qýanyshtymyn», deıdi О́skemennen kelgen Jambyl gımnazııasynyń oqýshysy Zere Maratova. Al Qyzylorda oblysy «Daryn» mektebinde bilim alatyn Arýjan Qonysbaeva óz shyǵarmasynda jańa tehnologııalardy qoldanyp salynǵan kıiz úı týraly baıandaǵan. Júldeli birinshi oryn alǵan almatylyq Álı Hasenniń qozǵaǵan máselesi tipten aýqymdy. «Qazaqstandy 2025 jyly qalaı elestetemin» degen taqyrypta jazǵan shyǵarmamda naqty tórt máselege toqtaldym. Birinshisi, Astanada ótip jatqan EKSPO-2017 kórmesi. Ekinshisi, Elbasynyń «Bolashaqqa baǵdar: rýhanı jańǵyrý» atty maqalasynda aıtyp ótkendeı, 2025 jyly latyn álipbıine tolyqtaı kóshý. Úshinshisi, óz aımaǵymyzdan shyqqan tarıhı tulǵalardy barynsha zertteý, kópshilikke tanytý jáne meshitter salý. Al tórtinshisi, elimizdegi kez kelgen mekteptiń Nazarbaev zııatkerlik mektebimen deńgeıles bolýy», deıdi Álı Hasen.
Mektep oqýshylarynyń baıqaýy aımaqtyq jáne respýblıkalyq kezeńderge bólingen. Ekinshi kezeńnen súrinbeı ótken oı-tolǵaýlardy arnaıy komıssııa logıka jáne talqylaýdyń aýqymy, baǵanyń naqtylyǵy men sheshimi, ıdeıanyń biregeıligi men bere bilýi syndy talaptar boıynsha baǵalady. Aqtyq saıysqa shyqqandar tarıhı oqıǵalar men jeke dúnıetanymyna súıene otyryp eldiń damýyna qatysty oı-pikirlerimen erekshelengen.
Dınara BITIK,
«Egemen Qazaqstan»
Sýretti túsirgen
Orynbaı BALMURAT,
«Egemen Qazaqstan»