Astanalyq oblystyń ınvestısııalyq tartymdylyǵy kún sanap artyp keledi. Osynyń aıǵaǵyndaı, elimizge belgili «MPZ Bıjan» fırmasy Kókshetaýda 1500 sharshy metr aýmaqty alyp jatqan jańa et óńdeý kombınatyn jumysqa qosty.
Almatyda et, shujyq ónimderiniń 70 túrin shyǵaryp, «Qazaqstannyń azyq-túlik rynogy kórmesiniń 10 altyn medalin jeńip alǵan fırma ólke damýyna jańa lep qosady. Aýysymdyq qýaty 70 iri qara maldy soıysqa jaratatyn óndiris basshylarynyń aldaǵy kezde bordaqylaý alańyn ashý jospary da qoldaýǵa turarlyq. Biz osyndaı serpindi umtylystar arqyly Elbasynyń eksporttyq áleýetti kúsheıtý jónindegi tapsyrmasyn oryndaýǵa salmaqty úles qosatyn bolamyz, deıdi kásiporynnyń ashylý saltanatynda sóz sóılegen Aqmola oblysy ákiminiń birinshi orynbasary Qadyrhan Otarov.
– Biz óz óndirisimizde dástúrli túrde Aqmola jáne Soltústik Qazaqstan oblystarynan jetkizilgen shıkizatty paıdalanamyz, –deıdi «MPZ Bıjan» fırmasynyń bas dırektory Hadısha Bıjan. – Kókshedegi kásiporyn ónimniń ózindik quny men saýda aınalymyndaǵy baǵany da arzandatatyn bolady. Sondaı-aq, Astananyń azyq-túlik beldeýine qatysýmen birge Reseı rynogyna jaqyndaı túspekpiz. Jańa kombınatta Germanııanyń ozyq jabdyqtary ornatylyp, zamanaýı tehnologııasy qoldanylady. Munda, qazirshe 30 adam jumyspen qamtylyp otyr.
«QazAgroQarjy» AQ Aqmola oblystyq fılıalynyń dırektory Bolat Sábıtov kásiporynnyń óndiristik jelisiniń jalpy quny 98 mıllıon teńgeni quraıtynyn aıtyp ótti. Aksıonerlik qoǵam aldaǵy kezde de osyndaı jańa qadamdardy qoldaıtyn bolady. Máselen, elimiz boıynsha aýyl sharýashylyǵy salasynda 94 mıllıard teńgeniń 14 ınvestısııalyq jobasyn qarjylandyrý josparlanǵan.
Jurtshylyq Kókshetaý kásipornynyń «Halal» standartymen jumys isteıtinin qýana qup kórip otyr. «Qazaqstannyń halal ındýstrııasy» assosıasııasynyń jáne «Halal» halyqaralyq tehnıkalyq komıtetiniń kýálikteri men sertıfıkatyn assosıasııanyń eksperti Erǵulan Shmetov tapsyrdy.
Baqbergen AMALBEK.
Kókshetaý.