Bul qanatqaqty joba aıasynda 100 oqýshy Rıdder agrarlyq-tehnıkalyq kolledjinde eńbek naryǵynda suranysqa ıe mamandyqtardy meńgerip shyǵatyn bolady. Oblys ákiminiń orynbasary Á.Núsipova aımaq basshysy D.Ahmetovtiń qoldaýymen 2017 oqý jylynda osy maqsatqa bıýdjetten 200 mıllıon teńgeden astam qarajat bólingenin aıtady.
Oqý bitirgen jastardy jumyspen qamtýǵa yqylas tanytyp otyrǵan «Qazsınk» JShS ákimshilik máseleler jónindegi atqarýshy dırektory A.Lazarevtiń sózine sensek, kásiporynǵa eń aldymen ken-baıytý jáne metallýrgııa salasynyń mamandary qajet.
«Rıdder qalasynda elimizdiń eshbir jerinde joq erekshe oqý ortalyǵy bar. Onda arnaıy jabdyqtalǵan kabınada otyrǵan oqýshy óz betimen júretin mashınany basqaryp, daǵdylanady. Qural-jabdyq shahtadaǵy is-qımyldardy tolyq qaıtalaıdy. Barlyq is-áreketter ekrannan 3D keskininde kóringendikten, stýdent ózin shahtada júrgendeı sezinedi. Sonyń nátıjesinde olarǵa keıin óndiriste jumys isteýge jeńil bolady», deıdi ol.
Oblystyq bilim basqarmasynyń basshysy N.Ábjaparovtyń aıtýynsha, 2017-2018 oqý jyldarynda óńirde kolledjderde bilim alýǵa alty myńnan astam memlekettik grant bólinipti. Barlyq granttardyń tórt jarym myńy jergilikti bıýdjetten, 1,7 oryn respýblıkalyq bıýdjetten qarjylandyrylady eken. «Ústimizdegi oqý jylynda 210 bala «Serpin» baǵdarlamasymen mamandyq meńgerip shyǵatyn bolady. Atalmysh baǵdarlama boıynsha barlyǵy 400-den astam jas bilim alyp jatyr. Bitirip shyqqan 20 túlek qazir «Qazsınk» kásipornynyń Rıdderdegi óndiris oryndarynda jumys isteıdi», deıdi basqarma basshysy.
Memorandým aıasynda bilim alyp shyqqan jastar tek «Qazsınk» kompanııasynda ǵana emes, sonymen qatar «Qazmınerals» sııaqty kásiporyndarda da jumys isteı alady. Aldaǵy ýaqytta bul jobany О́skemen qalasynda da júzege asyrý josparlanǵan.
Azamat QASYM,
«Egemen Qazaqstan»
О́SKEMEN