Fınalǵa shyqqan qazaqstandyq segiz boksshynyń altaýy Azııa chempıondary atandy. Atap aıtqanda, Mahmud Sabyrhan (48 kg), Beıbarys Jeksen (52 kg), Aıtjan Áshirhan (54 kg), Erasyl Jákpekov (70 kg), Qýandyq Maqsut (75 kg) jáne Saǵyndyq Toǵambaı (80 kg) altyn júldege ıe boldy. Al Aqylbek Muhtarov (46 kg) pen Bekzat Erimbet (60 kg) kúmis medaldy mise tutty.
Sóıtip, Qazaqstan quramasy alty altyn, eki kúmis jáne eki qola júldemen eń úzdik nátıjege qol jetkizdi. Ekinshi oryndaǵy О́zbekstan komandasynda úsh altyn jáne úsh kúmis medal bar. Japonııa quramasy eki altyn, bir kúmis júldemen úzdik úshtikke ilikti.
«Real» – ÝEFA Sýperkýbogynyń ıegeri Fýtboldan ÝEFA Sýperkýbogy úshin bolǵan kezdesýde Chempıondar lıgasynyń jeńimpazy «Real Madrıd» (Ispanııa) pen Eýropa lıgasynyń chempıony «Manchester Iýnaıted» (Anglııa) komandalary kúsh synasty.
Oıynnyń birinshi taımy koroldik klýbtyń basymdyǵymen ótti. Sonyń aıǵaǵyndaı, matchtyń 24-mınýtynda «Realdyń» qorǵaýshysy Kazemıro esep ashty. Ekinshi taımnyń 54-mınýtynda jartylaı qorǵaýshy Isko esepti ulǵaıtyp, 2:0-ge jetkizgen. Osydan keıin «Manchester Iýnaıted» fýtbolshylary ese qaıtarýǵa jappaı umtyldy. Biraq, olardyń shamasy Navas qorǵaǵan qaqpaǵa bir gol soǵýǵa ǵana jetti. Goldyń avtory – Lýkaký (62).
Sonymen, Zıdan basqarǵan «Real» fýtbol klýby óziniń Eýropadaǵy eń myqty ujym ekenin kezekti jeńisimen dáleldedi.
Ázirlegen
Qaırat JÚNISULY