Turǵyndar men BAQ-tyń suraqtaryna QR BǴM Joǵary jáne joǵary oqý ornynan keıingi bilim departamentiniń dırektory Gúlzat Kóbenova jaýap berdi.
«Kez kelgen ata-ana men talapker bilim grantynan úmitti ekeni túsinikti. Bıyl mınıstrlik bakalavrıat boıynsha grant sanyn 6 myńǵa ósirdi.
Degenmen, tańdaý barysynda eskeretin jaıt – ár túrli mamandyq boıynsha bólingen granttar sany da birkelki deńgeıde emes. Nátıjesinde ár mamandyq boıynsha bilim grantyn alý úshin belgili bir deńgeıde ball jınaý qajet. Degenmen, bul – jańalyq emes. Byltyr da, aldyńǵy jyly da osylaı bolǵan. Sol sebepti talapkerler mamandyqtarǵa qandaı báseke bolatynyn bilýleri úshin ár mamandyq boıynsha bólinetin granttar kólemi jyl saıyn UBT ótkizilgenge deıin belgili bolady.
Mamandyq tańdaý talapkerler men olardyń ata-analarynyń tańdaýy bolyp tabylady. Kóbine zań isi, qarjy isi syndy tanymal, sondaı-aq, grant sany az bolingen mamandyqtarǵa suranys túsedi. Oǵan qosa, talapkerler naqty bir JOO tańdaıdy. Sondyqtan grant alý úshin UBT upaılary ártúrli mamandyqtar men JOO-yna qaraı ózgeshelenedi.
Sonymen qatar, ata-analar aýyl kvotalary men jeńildikterdi paıdalanatyn basqa da kategorııadaǵy adamdardyń bar ekenin de eskerý tıis. Ondaı talapker UBT-dan alǵan upaı sanynyń tómen bolǵanyna qaramastan grant ıegeri atanady. Bul da jyl saıyn qaıtalanatyn jaǵdaı.
«Altyn belgi» ıegerleri qoldanystaǵy zańǵa sáıkes jeńildik ala alady. Mınıstrlik olardyń UBT-dan alǵan upaı sanyn ózge talapkerlerge teńegen zań jobasy qarastyrylýǵa berilgen, biraq áli qabyldanbady. Ol zań kúzde qabyldanýy múmkin, sonda ǵana «Altyn belgi» ıegerlerine beriletin jeńildikter joıylyp, basqalarmen teń dárejede qarastyrylady.
Qaıtalap aıtqanda, quramyna JOO Assosıasııasynyń, «Atameken» UKP-nyń, kásipodaqtar men basqa da qoǵamdyq uıym ókilderinen kirgen respýblıkalyq komıssııa óz sheshimderin qoldanystaǵy zań talaptaryna sáıkes qabyldaǵan.
Ulttyq testileý ortalyǵy búgin qoǵamdyq qabyldaý bólmesin ashyp, ár ata-anamen jeke túsindirý jumystaryn júrgizedi. Qazirgi ýaqytta +7 (71 72) 69 50 76, 69 52 61 nomerlerine habarlasyp, qaýyrt jeli arqyly qajetti aqparat alýǵa bolady.
Mınıstrlik joǵary ball alǵan talapkerlerge JOO-nyń grant tarynyń bólinýine usynys jasaıdy. Sonymen qatar, mınıstrlik bıyl ár oblys ákimderiniń granttarynyń bólinýine jaǵdaı jasady. Aldaǵy 2 apta ishinde ákimdiktermen osy baǵytta jumys jasalady.
Birde-bir talapker nazardan tys qalmaıdy».