Ajary aıshyqty aýyl Týyp-ósken jerim Birlestikke kelgen saıyn kóńilim kóterilip, erekshe shabytqa bólenemin. Aýylymyz ýaqyt aǵymy qansha qubylsa da, qut-bereke daryǵan berik dástúrinen aınyǵan emes. Táýelsizdik jyldary jańadan 65 úı turǵyzylyp, tútin sany 150-ge jetti. Jylyna 10-12 sábı ińgálap dúnıe esigin ashady.
Aýyldastarym shetinen eńbekqor, uıymshyl. Úlkenderden úlgi-ónege alǵan jastarymyz el erteńiniń laıyqty izbasary retinde ósip keledi. Turǵyndardy 1991 jyly jataqhana úlgisinde salynǵan, ne sport zaly, ne ashanasy joq ǵımarattyń jaıy qatty tolǵandyratyn. Mekteptegi 128 oqýshy, daıarlyq tobyndaǵy 22 bala, shaǵyn ortalyqtaǵy 30 búldirshin úshin óte tarlyq etetin. Jerlesimiz, Parlament Májilisiniń depýtaty Káribaı Musyrmanmen ótken kezdesýde kóp jyldan beri sheshilmeı kele jatqan máseleni jetkizgen bolatynbyz. Jýyrda jaqsy habar aldyq. Halyq qalaýlysy oblys ákimine kirip, bolashaǵy jarqyn eldi meken turǵyndarynyń muqtajyna kómektesýdi ótinipti. Depýtattyq saýalǵa oraı sport zalynyń jobalaý-smetalyq qujattaryn ázirleýge qarjy bólinip, jergilikti qazyna qarajaty esebinen 2018 jyly salynatyny aıtylypty. Týǵan jerge týyn tigip, aýyldyń órkendeýine laıyqty úles qosyp júrgen muǵalimder mundaı sheshimge erekshe rıza.
Taılaq JALMURZENOV, eńbek ardageri Soltústik Qazaqstan oblysy, Aıyrtaý aýdany
Jeltoqsandyqtarǵa taǵzym
Jýyrda Túrgen aýyldyq mádenıet úıinde «Jeltoqsan qurbandaryna myń taǵzym» atty eske alý keshi ótti. Taýtúrgen ortalaý mektebiniń muǵalimi Esendos Asýbaı Jeltoqsan oqıǵasyna toqtala kelip, táýelsizdik úshin janyn qurban etken jastardy únsizdikpen eske alyp, taǵzym etti. Túrgen aýylynyń ákimi Bota Eleýsizova da Jeltoqsan oqıǵasynyń tarıhı mánine toqtala kelip, jastardy bilimdi meńgerip, elimizdiń patrıottary bolýǵa shaqyryp, osy keshti uıymdastyrýshylarǵa alǵysyn bildirdi. Mektep oqýshylary Jeltoqsan qurbandary jaıly óleńder oqyp, aıtýly oqıǵadan beınekórinister usynyldy. Túrgen aýyldyq kitaphanasynyń qyzmetkeri A.Karbozova jeltoqsandyqtardyń Otanǵa degen adaldyǵy men armanyn, shynshyldyǵy men jeńisin urpaqtan-urpaqqa nasıhattaý bizdiń mindetimiz deı kele, Túrgen aýyldyq kitaphanasynyń uıymdastyrýymen aýyl aımaǵyndaǵy mektepter arasynda «Jeltoqsan jeli – yzǵarly» atty shyǵarmashylyq baıqaý ótetindigin jarııalap, onyń erejesi men qoıylatyn talaptaryn aıtyp ótti.
G.SAIBOSYNOVA Almaty oblysy
Pysyqaılarǵa aıyppul salyndy Alkogol ónimderi men temeki saýdasyna shekteý qoıylǵanymen, keıbir bazar aýmaqtarynda zııandy ónimderdiń saýdasy qyzyp tur. Osyǵan oraı Mańǵystaý aýdandyq salamatty ómir saltyn qalyptastyrý ortalyǵy men aýdandyq jastar resýrstyq ortalyǵy mamandarynyń muryndyq bolýymen, aýdandyq jergilikti polısııa qyzmetiniń qoldaýymen arnaıy top qurylyp, Shetpedegi saýda oryndarynda túsinik jumystaryn júrgizý úshin reıd uıymdastyryldy. Quzyrlylardyń eskertýlerine qulaq aspaı kelgen pysyqaılarǵa aıyppul salyndy. Bizdiń reıdtiń maqsaty – túngi mezgilde jáne kámeletke tolmaǵan balalar men jasóspirimderge araq-sharapty satqyzbaý. Aıta keteıin, ekinshi jarty jyldyqta Shetpede túngi beımezgil ýaqytta zııandy ónimderdi saýdalaǵan 10-ǵa jýyq saýda oryndarynyń ıelerine birneshe ret aıyppul salynǵan. Aldaǵy ýaqytta mundaı sharany jıi uıymdastyratyn bolamyz.
Allabergen QONARBAEV Mańǵystaý oblysy, Mańǵystaý aýdany
Jekege jem satylsa eken... Qazirgi tańda Astana qalasynda tursaq ta, ósken jer – aýyl jaqqa qaraı eleńdep júremiz. Kindik qan tamǵan topyraqta týǵan-týys, dos-jaran qaldy. Solarmen anda-sanda bir tildesip, aýyl-aımaqtyń amandyǵyn bilip turýdyń ózi árbir sanaly azamattyń perzenttik paryzy dep oılaımyn. Jaqynda Qaraǵandydaǵy Nura aýdanynyń ortalyǵy Nura aýylyndaǵy tanystaryma telefon soqqanymda, mynadaı áńgimeden qulaǵdar boldym. О́ńirde eginniń bıik shyqqany belgili, qamba toly astyq. Degenmen, aýdan ortalyǵyndaǵy azyn-aýlaq malyna qarap otyrǵan aǵaıyn jemnen qysylyp otyr eken. Jekege jem satylmaıtyn kórinedi. Elevatorlar men qoımalardyń mańy kúnuzaq kezek kútken adamdarǵa toly. О́kinishtisi sol, jem úshin janjaldasyp qalatyn turǵyndar da bar deıdi... Búgingi kúnde astyq ósiretin sharýashylyqtardyń bári jekemenshiktiń qolynda ekeni belgili. Álbette, olar ónimin kimge, qaıda satarlaryn ózderi biledi. Degenmen, aýdan basshylary qarapaıym sharýalardyń muńyna qulaq túrip, osy máseleniń sheshimin tapsa degen tilek bar.
Beısenbek ÁLKENOV, aýyl sharýashylyǵy salasynyń ardageri ASTANA
Kitap oqıtyndar jetkilikti Amangeldi aýdanynyń ortalyǵynda eńseli eki qabatty aqshańqan ǵımarat aldynda jastarǵa úlgi ónege-bolatyn eki úlken eskertkish tur. Biri − jazýshy artyna óshpes mura qaldyrǵan Aqan Nurmanov, ekinshisi aýdanymyzǵa mádenıettiń nuryn sepken mádenıettanýshy Tóken Eltebaev. Al, osy ǵımarattyń ishine enseńiz rýhanı baılyǵymyz – kitaphana sizge esigin aıqara ashady. Jyl ótken saıyn kitaphanamyz jańa basylymdarmen, ártúrli serııalarmen shyǵarylǵan aqyn-jazýshylardyń kitaptarymen tolyqtyrylyp keledi. Oqyrman sany da kóbeıýde. Kitaphanamyzda ártúrli is-sharalar jıi ótedi. Ortalyq kitaphananyń negizgi oqyrmandary oqýshylar, zeınetkerler, ustazdar, mekeme qyzmetkerleri. Ár oqyrman oqyǵan kitabynan rýhanı lázzat alǵysy keledi. Sondyqtan suraǵan ádebıetterin taýyp, tilin tabýǵa ár kitaphanashy múddeli. Kitaphanaǵa jıi keletin oqyrmandarymyz. Qozy Seıdahmetov, Nursulý Ábdildına, Kátep Ábdirahmanova, Serik Jumaǵulov, Baqytkereı Asqarov, Nurlybek Kenjebekov, Anatolıı Govrılenko, Beısenǵalı Ahmetov, Jańyl Seıdahmetova, Dúısenbek Sársenbetov, t.b.
Ár oqyrmannyń talap-tilekteri ártúrli, keıbiri baspasóz basylymdarynan birneshe jyl buryn shyqqan materıaldardy izdeıdi. Tarıhı kitaptarǵa, kásipkerlikke baılanysty, mal sharýashylyǵy, tehnıka týraly ádebıetterge suranys joǵary.
Móldir Ámirjanova Qostanaı oblysy, Amangeldi aýdany