Jıyndy ashqan Qazaqstan Respýblıkasynyń Tuńǵysh Prezıdenti – Elbasy qorynyń atqarýshy dırektory Qanat Jumabaev forýmnyń maqsaty eki eldiń áriptestik baılanysyn nyǵaıtyp, transshekaralyq máselelerdi sheshýge ún qosý ekenin jetkizdi. «Prezıdent Nursultan Nazarbaev atap ótkendeı, biz memleketter shekarasynda uzaq merzimdi ekonomıkalyq ósý ortalyqtaryn damytýǵa tıispiz. Shekaralas elderdiń arasynda tyǵyz baılanys bolmasa, qandaı salanyń da órkendeýi qıyn. Jalpy, saıası, ekonomıkalyq, mádenı jáne gýmanıtarlyq ýaǵdalastyqtar naqty jobalar arqyly júzege asyrylýy kerek. Osy oraıda qazirgi zaman tehnologııasynyń tilin meńgergen, jańasha kózqarasy bar jas ǵalymdardyń pikiri men oı-usynystary biz úshin mańyzdy», dedi Qanat Nesipbaıuly.
Onyń aıtýynsha, Elbasy qorynda jas ǵalymdar keńesi jumys isteıdi. Olar Reseı ǵylym akademııasyndaǵy jastar keńesimen birlesip, jahandyq trendterge qatysty oılaryn ortaǵa salyp, eki el úkimetine, basqa da uıymdarǵa usynymdar ázirlemek. Sonymen qatar, aýyl sharýashylyǵy, mashına jasaý, IT-tehnologııa, bıotehnologııa sekildi salalarda kóptegen zertteý júrgizip, memleketterdiń damýyna paıdasy mol birlesken jobalar jasamaq.
Budan keıin sóz alǵan Reseı Ǵylym akademııasynyń jas ǵalymdar keńesiniń tóraǵasy Andreı Kotelnıkov byltyr jas ǵalymdardyń II eýrazııalyq forýmyn ótkizý mártebesin Qazaqstan ıelengenin, osynaý alqaly jıynda álemdik ahýaldardy sheshýge baılanysty mańyzdy máseleler kóterilgenin atap ótti. «Qazirgi tańda álem qubylmaly jaǵdaıdy bastan keship otyr. Dúnıe júziniń kóptegen elindegi shıelenisti jaǵdaılardan bizdiń memleketter de tys qala almaıdy. Sondyqtan ǵalamshardaǵy oqıǵalardy qalt jibermeı, ózindik kózqarasymdy bildirip, belsendi bolýymyz kerek. Bizdiń kúsh-jigerimiz birikkende ǵana kedergiler men qıyndyqtardy eńsere alamyz», dedi ol.
Al S.Kýtateladze atyndaǵy jylý fızıkasy ınstıtýtynyń ǵalymy Sergeı Dvoınıshnıkov bıyl Qazaqstan EKSPO halyqaralyq kórmesin ótkizý arqyly kúlli álemniń nazaryn ózine aýdaryp otyrǵanyn aıta kele, bolashaq energııasy búginde ǵalamshardy alańdatyp otyrǵan ózekti taqyryp ekenin alǵa tartty. Balamaly energııa kózderin damytýdyń paıdaly tusyn aıtqan ol energetıka tehnologııasynyń tıimdiligin arttyratyn optıkalyq júıe týraly jobasyn jurtshylyqqa tanystyrdy. Onyń aıtýynsha, mundaı jańa júıe óndiristik jáne tehnıkalyq qyzmet kórsetý shyǵyndaryn azaıtyp, qaýipsizdikti arttyratyn kórinedi. Sondaı-aq, energetıkalyq tehnologııanyń qýatyn joǵarylatyp, qoldanystaǵy energoagregattardy zamanaýı dıagnostıkalyq júıemen qamtamasyz etedi.
Halyqaralyq forým búgin Býrabaı kýrorttyq aımaǵynyń «Oqjetpes» emdeý-saýyqtyrý kesheninde jalǵasady. Onda forýmǵa kelgen belgili ǵalym-sarapshylardyń sheberlik dáristeri ótip, Qazaqstan men Reseıdiń shekaralas aýdandardyń áleýmettik-ekonomıkalyq jaǵdaıy men týrıstik klasterin damytý máseleleri keńinen talqylanady.
Jalpy, alqaly jıynǵa barlyǵy 100-den asa ǵalym qatysyp otyr. Forýmda bıotehnologııa, nanotehnologııa, dástúrli jáne balamaly energııanyń damý bolashaǵyna qatysty bas-aıaǵy 40-tan asa baıandama oqylatyn bolady.
Qymbat TOQTAMURAT, «Egemen Qazaqstan»