Kez kelgen memlekettiń áleýmettik jáne ekonomıkalyq ıgiliginiń mańyzdy tetikteriniń biri – eldegi tabysty kásipkerlik ekeni sózsiz. Qazaqstan Prezıdenti ekonomıkanyń osy salasyna jan-jaqty qoldaý kórsetý týraly tapsyrma júktegen bolatyn. Bul tapsyrmany júzege asyrýdyń negizgi joly elimizdiń 2020 jylǵa deıingi Strategııalyq damý jospary bolyp tabylady. Osy ýaqytta ishki jalpy ónimdegi shaǵyn jáne orta bıznes mekemeleriniń úlesi 7-10 paıyzǵa deıin artýy tıis. Bul Qazaqstannyń bıznes-ahýaly joǵary 50 eldiń qataryna enýine múmkindik beredi.
Sondyqtan elimizde kásipkerlikti damytýǵa jaǵdaı jasaý úshin partııa kóptegen aýqymdy sharalardy qolǵa alyp keledi. Máselen, partııanyń bastamasymen zańnyń bızneske baılanysty tarmaǵyna shyǵyndardy azaıtý týraly ózgeris engizildi. Sondaı-aq, júıequraýshy kásiporyndardyń qatysýymen shaǵyn jáne orta bıznesti damytý boıynsha jańa joba tabysty júzege asyrylyp keledi.
Sonymen birge, «Bıznestiń jol kartasy-2020», «Eńbekpen qamtý strategııasy-2020», ındýstrııalandyrý kartasy sııaqty mańyzdy baǵdarlamalardyń oryndalýy partııanyń qatań baqylaýynda.
Qazaqstandaǵy bıznes ahýaldy jaqsartý tóńiregindegi osy jáne ózge de mańyzdy máseleler keshe «Nur Otan» partııasy uıymdastyrǵan «dóńgelek ústel» barysynda sóz boldy. Partııa Tóraǵasynyń birinshi orynbasary Nurlan Nyǵmatýlınniń atap ótkenindeı, «Elbasymyz, partııamyzdyń Tóraǵasy Nursultan Ábishuly Nazarbaev otandyq bıznesti damytý, básekege qabiletin arttyrý mindetin qoıyp otyr. Sondyqtan, osy maqsatqa jetý úshin ártúrli kedergilerge jol bermeı, kásipkerlerimizdi qorǵaý jáne qoldaý kórsetý «Nur Otan» partııasynyń negizgi maqsaty deýge bolady. Osyǵan baılanysty partııamyz búgin jańa usynystar engizip, naqty sharalardy qolǵa alyp jatyr».
Elbasy memleketimizdegi bıznes ahýaldy jaqsartý úshin birqatar strategııalyq mindetter júktedi. Ol eń aldymen, lısenzııalar men ruqsat berýlerdi, tekserýlerdi azaıtý. Máselen, osy ýaqytqa deıin 300-den astam ruqsat berý qujattaryn qysqartý múmkindigine ıe boldyq. 2015 jylǵa deıin bızneske baılanysty shyǵyndar taǵy da 30 paıyzǵa deıin tómendeýge tıis.
Memlekettik mekemelerdiń ruqsatnamalary men baqylaý-qadaǵalaý qyzmetterin qysqartý jónindegi Elbasy tapsyrmasynyń oryndalýy týraly Saýda jáne ekonomıkalyq damý mınıstri Qaırat Kelimbetov baıandady. Ol «Nur Otan» men bıznes-qaýymdastyqtyń qatysýymen daıyndalǵan memlekettik organdardyń baqylaý-qadaǵalaý jáne lısenzııalaý-ruqsat berý qyzmetterin odan ári reformalaý usynystaryn alǵa tartty. Ol birneshe kezeńderden turady. Birinshiden, lısenzııalar men ruqsattardy 30 paıyzǵa qysqartý, sondaı-aq, ruqsattardyń keıbir túrlerin habarlama tártibine aýystyrý. Odan ári ruqsatnamalar tizbegin olardyń qaýiptilik deńgeıine baılanysty sanattaryna jáne biregeı talappen bekitiligen tártipke sáıkes bir ǵana zańmen tolyqtaı anyqtaý kózdelip otyr. Nátıjesinde barlyq ruqsatnamalardy jappaı elektrondyq túrge aýystyrý jáne HQKO arqyly júzege asyrý josparlanǵan.
Atalǵan ózekti máseleni sheshý úshin birlesip, bılik pen bıznes arasyndaǵy baılanysty jańa deńgeıge kóterý kerek. Ol ózgeristerdi «Atameken» Odaǵy men Úkimettiń kúshin biriktirý arqyly júzege asyrýǵa bolady. Bul «Nur Otan» partııasynyń usynysy. Bıznes orta ókilderi mundaı áriptestiktiń kásipkerlikti kóterý, jalpy alǵanda, elimizdi damytý jolynda oń nátıje beretinine senimdi.
Partııa bıznes salasy máselelerin sheshýdegi birlesken ıgi qadamdardyń oryndalýyn qatań baqylaýǵa almaq. Sebebi, Qazaqstannyń jańa ekonomıkalyq damýynyń tıimdiligi qýatty kásipkerlik ortamen tyǵyz baılanysty.
«Egemen-aqparat».