Akademııanyń oqý jumysy jáne aqparattyq tehnologııalar jónindegi vıse-rektory Áltaır Ahmetovtiń pikirinshe, úmitkerge qoıylatyn talaptar qazirgi zaman aǵymyna laıyq jetildirilgen. Ol mundaı júıeni Nazarbaev ýnıversıtetinen keıin ekinshi bolyp qabyldap otyrǵan Memlekettik basqarý akademııasy ekenin aıtady.
«Jańa júıe arqyly bilim alýǵa yntaly memlekettik qyzmetkerdi tańdaýǵa múmkindik mol. Qazirgi qabyldaý emtıhany úmitkermen tikeleı jumys isteýge, onyń qarym-qabiletin baǵamdaýǵa óte qolaıly», – deıdi Áltaır Ahmetov.
Memlekettik basqarý akademııasyndaǵy bilim júıesi de, baǵalaý da aıtarlyqtaı ózgertilgen. Oqý jyly barysynda stýdentter shetelge baryp, ondaǵy memlekettik qyzmetkerlerdiń tájirıbesin úırenip qaıtady. Sondaı-aq, olardyń eńbekterin baǵalaý túrli deńgeılerde júrgiziledi. Áltaır Ahmetovtiń aıtýynsha, jańa júıe Elbasy Nursultan Nazarbaevtyń «100 naqty qadam» Ult josparynyń 15-qadamyn júzege asyrý boıynsha jasalyp jatyr.
Akademııaǵa oqýǵa túsý úshin úmitker úsh kezeńnen turatyn emtıhannan ótedi. Eń áýeli qajetti qujattarymen birge eki shyǵarma qosyp tapsyrady. Birinde yntalandyrý jóninde esse jazsa, kelesi shyǵarmanyń taqyryby mamandyqqa baılanysty. Osy arqyly úmitkerdiń taldamalyq jáne synı oılaý qabileti anyqtalady. Shyǵarmalardy eki sarapshy baǵalaıdy eken. Olarǵa tekseriletin shyǵarmanyń avtory týraly aqparat berilmeıdi. Eki sarapshynyń baǵalaýyndaǵy aıyrmashylyq óte úlken bolsa, shyǵarmany úshinshi sarapshy tekseretin kórinedi. Qorytyndy nátıje sodan keıin shyǵady. Al shyǵarma jazýǵa kerekti aqparattyń bári akademııa saıtynda tur.
Ekinshi kezeńde úmitkerdiń aǵylshyn tilin bilý deńgeıi anyqtalady. Áltaır Ahmetov qazaq tili men orys tili kúndelikti qoldanysta ekenin, halyqaralyq til – aǵylshyn tili tańdalǵanyn aıtady. Bul kezeńde APTIS til baǵalaý júıesi tańdalǵan. Testi ótkizý quzyreti tolyqtaı British Council-ǵa senip tapsyrylypty. Kompıýter arqyly júrgiziletin bul emtıhannyń qorytyndysy Londonǵa jiberilip, nátıje 72 saǵattan keıin belgili bolady. Áıtse de, bul kezeńniń ereksheligi bar. Eger úmitker buǵan deıin IELTS, TOEFL ne APTIS tapsyryp, onyń nátıjesi talapqa saı bolsa, olar birden kelesi kezeńge ótedi. Sonymen qatar, Nazarbaev ýnıversıteti» sekildi bilim berý júıesi aǵylshyn tiline negizdelgen joǵary oqý oryndary túlekteriniń ekinshi emtıhandy tapsyrýy mindetti emes.
Úshinshi kezeńde arnaıy komıssııa músheleri úmitkermen betpe-bet áńgimelesedi. Onda talapkerdiń kásibı, taldamalyq, kommýnıkatıvtik jáne tulǵalyq qasıetteri baǵalanady. Suhbat erkin formatta, úmitker qalaǵan tilde ótedi. Alaıda ol qalǵan eki tildegi suraqtarǵa da jaýap berýge mindetti. Áltaır Ahmetovtiń aıtýynsha, komıssııa quramyna Prezıdent Ákimshiligi, Qaýipsizdik keńesi, qala ákimderi sekildi quzyrly mekeme ókilderi kiredi.
Basqarý akademııasyna oqýǵa qabyldaý 10 mamandyq boıynsha júrgizildi. Bıyl magıstratýraǵa 120, doktorlyqqa 12 grant bólinipti. Budan bólek, oqý ornynda aqyly túrde de bilim alýǵa múmkindik jasalǵan. Búginde Qyrǵyzstan, Tájikstan jáne Mońǵolııa sekildi elderdiń memlekettik qyzmetkerleri akademııada tájirıbesin jetildirýge nıet bildirip otyr. Memlekettik basqarý akademııasyna bıyl oqýǵa qabyldanǵandar aldaǵy aptada belgili bolady.
Abaı ASANKELDIULY, «Egemen Qazaqstan»