Lıvııanyń ulttyq ótpeli keńesiniń ókili eldiń eks-prezıdenti Mýammar Kaddafıdiń kenje ulynyń ustalǵany týraly aqparatty teriske shyǵardy. Buǵan deıin Mýtassım Kaddafıdiń ákesiniń týǵan qalasy – Sırtta qolǵa túskeni týraly habar taraǵan bolatyn.
Ulttyq ótpeli keńes ókiliniń sózine qaraǵanda, shynynda Sırt tóńireginde Mýtassım Kaddafıge jaqyn adamdar ustalǵan. Biraq onyń ózi qolǵa túspegen. Jáne onyń dál qazir qaı jerde jasyrynyp júrgeni de belgisiz. Búginde ulttyq ótpeli keńes Lıvııanyń Banı-Valıd qalasynan basqa aýmaqtyń bárine óz baqylaýyn júrgizip otyr.
QARJYLANDYRÝDY SAQTAÝǴA KEŃES BERDI
AQSh memlekettik hatshysy Hılları Klınton prezıdent Barak Obamaǵa Vashıngtonnyń BUU-ny qarjylandyrýǵa qatysýyn shekteıtin zań jobasyna veto qoıýdy usyndy. О́ıtkeni, deıdi memlekettik hatshy, zań osy kúıinde qabyldanyp ketse, AQSh-tyń ulttyq qaýipsizdigine qater tónedi.
Qazirgi kezde Qurama Shtattar BUU bıýdjetiniń tórtten úshin bir ózi qarjylandyrady. Sondyqtan da atalǵan uıym kóp jaǵdaıda AQSh-tyń aıtqanynan shyǵa almaıdy. H.Klıntonnyń ulttyq qaýipsizdikke qater tónedi degende osyny meńzegeni kúmánsiz. Osy sebepti Aq úıdiń zań jobasynyń eski nusqasynda qabyldanýyna jol bermeıtini túsinikti.
PÝTINDI USYNATYN ÝAQYT BELGILENDI
«Edınaıa Rossııa» partııa seziniń ekinshi bóligin 27 qarashada ótkizýdi josparlap otyr. Bul jóninde «ER» bas keńesi tóralqasynyń hatshysy Sergeı Neverov málimdedi. Osy sezde partııa serkesi Vladımır Pýtın Reseı prezıdenttigine resmı túrde ilgeriletiletin bolady.
Reseı prezıdentin saılaý shamamen 2012 jyldyń 4 naýryzyna belgilenbek. Al Reseı úkimetiniń qazirgi tóraǵasynyń prezıdenttik saılaýǵa túsetini 24 qyrkúıekte-aq belgili bolǵan edi. Sezdiń birinshi bóliginde is basyndaǵy prezıdent Dmıtrıı Medvedev úkimet tóraǵasynyń paıdasyna prezıdenttikke túsýden bas tartqan bolatyn.
QARA NÁSILDI SÝYRYLYP ALǴA ShYQTY
Qara násildi kásipker Herman Keın AQSh-tyń Respýblıkalyq partııasynan prezıdenttikke kandıdattyq kúresinde kóshbasshy orynǵa kóterildi. Eldegi belgili telearna saıtynda jarııalanǵan sońǵy suraý salýlar nátıjesi osylaı dep otyr.
H.Keınge aldaǵy praımerızde respýblıkashylardyń 27 paıyzy óz daýystaryn berýge ázir ekendikterin málimdese, Massachýsetstiń burynǵy gýbernatory Mıtt Romnıge – 23 paıyz, Tehas gýbernatory Rık Perrıge – 16 paıyz, kongressmen Ron Polǵa 11 paıyz daýys berilmekshi eken. Al munyń aldyndaǵy suraý salýlardyń qorytyndysynda Romnı men Perrı kósh basynda turǵan bolatyn.
BÝShTY TUTQYNDAÝǴA О́TINISh JASADY
«Halyqaralyq amnıstııa» quqyq qorǵaý uıymy Kanada basshylyǵyna AQSh-tyń burynǵy prezıdenti kishi Djordj Býshty tutqyndaýǵa ótinish jasady. Quqyq qorǵaýshylardyń pikirinshe, Býsh adam quqyn buzyp, OBB-ǵa tutqyndaǵylardy azaptaý tásilderin qoldanýǵa tapsyrma bergeni úshin jaza tartýy tıis.
Quqyq qorǵaý uıymy halyqaralyq qoǵamdastyq Býshty jaýapkershilikke tartýy tıis dep sanaıdy. О́ıtkeni, AQSh basshylyǵy mundaı qadamnan bas tartyp otyr. Al Qurama Shtattardyń burynǵy prezıdenti 20 qazanda Sýrreı qalasynda ótetin ekonomıkalyq sammıtke qatysý úshin Kanadaǵa kelýi tıis. Ústimizdegi jyldyń aqpanynda osyndaı talap saldarynan Býsh Shveısarııaǵa saparynan bas tartýǵa májbúr bolǵan edi.
ÁIELI – QARAPAIYM OTBASYNAN ShYQQAN QYZ
Afrıkadaǵy Býtan degen shaǵyn ǵana memleket buǵan deıin tomaǵa-tuıyq tirshilik keship kelgen-tin. Sońǵy kezderi ol halyqaralyq qoǵamdastyqqa azdap bolsa da ashyla bastady. Osynyń aıǵaǵyndaı, Býtan koroli Djıgme Khesar Namgıal Vangchýktiń qarapaıym otbasynan shyqqan qyzǵa úılengeni belgili bolyp otyr.
Vangchýk álemdegi táýelsiz memleketter ishindegi eń jas monarh bolyp tabylady. Al kelinshegi qarapaıym otbasynan shyqqan degende, qaıyn atasy kádimgi ushqysh kórinedi. Djetsýn Pemanyń ózi bolsa stýdent eken. Koroldiń jasy 31-de, kelinsheginiki 21-de. Hramdaǵy úılený saltanaty ulttyq televızııa arqyly búkil elge kórsetilipti. Barlyq rásimder aıaqtalǵannan keıin korol men patshaıym bal aıy saıahatyna attanbaqshy.
QYSQA QAIYRYP AITQANDA:
Ýkraınanyń burynǵy premer-mınıstri Iýlııa Tımoshenkonyń Reseıdiń «Gazprom» kompanııasymen kelisim-shart jasasý kezinde óz ókilettigin asyra paıdalandy degen aıyppen jeti jylǵa sottalǵany belgili. Onyń qyzy Evgenııa Karr muny «tehnıkalyq qatelik» jáne «kek qaıtarý aktisi» dep málimdep, anasynyń jaqyn arada bostandyqqa shyǵatynyna senim bildirdi.
«Edınaıa Rossııa» Memlekettik dýmaǵa saılaýda kem degende 65 paıyz daýys jınaý týraly tapsyrma aldy degen áńgimeni teriske shyǵardy. Munyń aldynda prezıdent ákimshiligi tarapynan gýbernatorlarǵa saılaýda «ER»-ny kem degende 65 paıyz daýyspen qamtamasyz etesińder degen turǵyda tapsyrma berildi degen habar taraǵan bolatyn.
Armenııada 12 qazanda halyq sanaǵy bastaldy. Ol 21 qazanǵa deıin sozylady. Bul eldegi KSRO ydyraǵannan bergi ekinshi jalpyhalyqtyq sanaq bolyp tabylady. Sanaqtyń tutastaı qorytyndysy keler jyldyń kúzinde jarııalanady dep kútilýde. Al 2001 jyly júrgen sońǵy sanaqta Armenııa halqynyń sany 3 mıllıon adamdy quraǵan bolatyn.
Berlınniń batys jaǵyndaǵy temir joldarǵa belgisiz bireýler qaıta-qaıta benzınnen jasalǵan jarylǵysh bombalar qoıyp jatyr. Sońǵy kúnderi nemis astanasynda jáne Brandenbýrg temir jolynda osyndaı birneshe oqıǵa tirkeldi. Jarylys saldarynan Berlın men Gannover jáne Volfsbýrg qalalary aralyǵynda qatynaıtyn poıyzdar júrmeı qaldy.
Internet materıaldary negizinde ázirlendi.