Elimizdegi 2016-2020 jyldarǵa arnalǵan bilim berýdi damytý kestesine sáıkes, oqý jyly qarsańynda orta synyptarǵa arnalǵan jańa oqý júıesi engiziledi. Atalǵan ózgerister elimizdiń barlyq mektepterinde 1, 2, 5, 7 synyptar arasynda júrgiziledi. Osyǵan oraı pedagogter basqosýynda 2, 5, 7 synyptardaǵy jańartylǵan oqý júıesiniń ereksheligi talqylandy.
Astana qalasyndaǵy Nazarbaev zııatkerlik mektebiniń dırektory Arsen Baıtýkovtyń aıtýynsha, búginde mektepterdegi ádil baǵalaýdyń ózektiligi men qajettiligin búkil pedagogıkalyq qoǵam sezinip otyr.
– Synı baǵalaý júıesinde oqytý men baǵalaýdyń arasyndaǵy ózara baılanysty júzege asyratyn mehanızmder bar. Bul baǵalaý oqý baǵdarlamalaryna sáıkestikti qamtamasyz etetin jáne oqý úderisin qoldaýǵa qurylǵan. Aıtalyq, qalyptastyrýshy baǵalaý – kúndelikti jumys barysyndaǵy baǵalaý. Baǵa oqýshylarǵa sandyq belgi retinde emes, oqýshylardyń jumysyna usynys retinde beriledi. Iаǵnı, qaısysy jaqsy atqaryldy, qaı jerde qate jiberildi, ony qalaı túzetý kerektigi aıtylady. Muǵalimniń usynystary oqý sapasyn jaqsartýǵa múmkindik beredi. Oqýshynyń oqýǵa jáne baǵalaýǵa degen kózqarasyn jaqsartady. Al jıyndyq baǵalaý – oqý baǵdarlamasyna sáıkes oqýdan keıin, sonymen qatar, belgili bir oqý kezeńi aıaqtalǵanda júrgiziledi. Baǵa oqýshylardyń jetistikterin, ıaǵnı tapsyrmalardy oryndaýdaǵy árbir qadamdaryn bekitý arqyly qalyptasady. Sondyqtan oqýshylardyń óz betimen oqýdan tys izdenisin jáne oqý baǵdarlamasyn tereńirek ıgerýge yntalandyrady, – deıdi A.Baıtýkov.
Muǵalimder sonymen qatar, ata-ana men ustaz arasyndaǵy baılanysty jyldamdatýǵa arnalǵan jańartylǵan oqý júıesin keńinen talqylady. Astana qalasyndaǵy №35 mekteptiń qazaq tili men ádebıeti pániniń muǵalimi Baıan Myqshaeva jańa oqý júıesiniń balalarǵa eń aldymen erkindik beretinin aıtady.
– Jańartylǵan bilim berý júıesine qatysty Nazarbaev zııatkerlik mektepteriniń muǵalimderi ótkizgen sheberlik saǵaty kóńilimnen shyqty. Bul júıede tájirıbeli ustazdar bolǵandyqtan kóptegen jańa maǵlumattar aldyq dep esepteımin. Mundaı júıemen oqyǵan bala keń túrde oılaıdy. Eki-úsh jyldyń ishinde bul júıe tolyǵymen enip, óz jemisin bere bastaıtynyna senimim mol, − deıdi ol.
Aldaǵy respýblıkalyq tamyz konferensııasy otyrysynda zııatkerlik mektepterdiń aýqymdy kórmesi ótpek. Kórmede muǵalimderdi ádistemelik qoldaýǵa arnalǵan metodıkalyq baza men oqý materıaldary usynylyp, «júıeli-metodıkalyq keshendi» kórsetý josparlanyp otyr. Jıyrma myńnan astam muǵalim qatysatyn respýblıkalyq pedagogıkalyq keńes aıasynda Nazarbaev zııatkerlik jáne qanatqaqty mektepterdiń bazalarynda bilim mazmunyn jańartý boıynsha seksııalyq otyrystar ótedi. Nazarbaev zııatkerlik mektepteri ortalyqtarynyń muǵalimderi men qyzmetkerleri, sondaı-aq, qanatqaqty mektep muǵalimderi jańartylǵan bilim berýdiń, synı baǵalaýdyń jáne bastaýysh mektepterde oqytýdyń erekshelikteri jóninde trenıngter men sheberlik-synyptar ótkizýde. Al tájirıbelik saǵattar qazirgi sabaqtardyń jańa formaty men ınnovasııalyq pedagogıkalyq tehnologııalardy engizýge arnalady. Negizgi nazar bilim berý prosesin sapaly ádistemelik turǵydan demeýge jáne otbasy qaýymdastyǵy men muǵalimder arasyndaǵy jedel qarym-qatynasty qalyptastyrýǵa baǵyttalyp otyr.
Dýman ANASh,
«Egemen Qazaqstan»