Kezdesý barysynda quqyq qorǵaý qyzmetiniń máseleleri men «Probasııa týraly» Zańdy tájirıbelik turǵyda júzege asyrý máseleleri qarastyryldy. Sonymen qatar, Parlament depýtatyn Departament jáne onyń bólimsheleriniń qyzmetindegi problemalyq jaıttar, áleýmettik jumys baǵyttary, sottalǵan azamattarǵa psıhologııalyq kómekti uıymdastyrý, atalmysh baǵyttar boıynsha Departamenttiń úkimettik emes uıymdarmen qarym-qatynas deńgeıi qyzyqtyrdy.
Jıynda aıtylǵandaı, buryn isti bolǵan jandardy sot sheshimi shyqqan sátten bastap túzetý mekemelerinen bosaǵanǵa deıin qaıta áleýmettendirý boıynsha kóp jaqty jumystar júrgiziledi, onyń qatarynda turǵyn úı jaıyn anyqtaý, qujattaryn daıyndaý men qaıta qalpyna keltirýge kómektesý, jumysqa ornalasýǵa járdemdesý bar. Alaıda, buryn sottalǵan azamattardy tirkeý máselesi birjaqty sheshilmegen. Zań boıynsha, jańa mekenjaıǵa kelgen adam 10 kúnniń ishinde jergilikti jeri boıynsha tirkeýge alynýy qajet. Biraq, bul merzim ishinde túzetý mekemesinen poshta arqyly keletin qujattar daıyn bolyp úlgermeıdi. Nátıjesinde, bostandyqqa endi shyqqan adamǵa sebepsiz aıyppul salynýy múmkin.
Osyǵan baılanysty, Beıimdeý ortalyǵyn sottalǵan azamattardy qaıta áleýmettendirý ortalyǵy retinde qaıta baǵdarlaý týraly usynys jasaldy. Gúlnár Bıjanova bul máselege Halyqty áleýmettik qorǵaý basqarmasyn, Qarjy basqarmasyn jáne ákimdikterdi tartý qajettigin alǵa qoıdy. Qadısha Ospanova da atalǵan máseleni quramyna oblystyq máslıhat depýtattary, úkimettik emes uıym ókilderi kiretin partııalyq komıssııada qaraýdy usyndy.
Sondaı-aq, kezdesýde Májilis depýtaty Qaraǵandynyń elimizdegi №1 HQKO negizinde Daǵdarys ortalyǵy ashylǵan alǵashqy qala ekendigin bildi. Bul Ortalyqtyń jumysy «bir tereze» qaǵıdasy boıynsha uıymdastyrylǵan. Munda probasııa qyzmetiniń, jumyspen qamtý jáne áleýmettik beıimdeý ortalyǵynyń qyzmetkerleri jumys jasaıdy. Problemalyq máselelerdiń biri retinde, Departament jáne Probasııa qyzmeti jumyskerleriniń tapshylyǵy aıtyldy.
Kóterilgen barlyq máseleler depýtattyń baqylaýyna alynatyn boldy. «Qandaı da bir zańnamalyq bastamany júzege asyrý ońaı emes. Ol úshin, zańdy barlyq jaǵynan negizdep, onyń qajettiligin dáleldeý kerek. Sondyqtan, memlekettik organdardyń, depýtattardyń, úkimettik emes uıymdardyń birlese jumys atqarýy mańyzdy», dedi halyq qalaýlysy.
Mıras ASAN,
«Egemen Qazaqstan» Qaraǵandy oblysy