- Ruqsat etilmegen jerlerge qoqystardy shyǵarýǵa jol bermeý maqsatynda biz turaqty jumys júrgizip turamyz. Munda jol patrýldik qyzmeti, ýchastkelik ınspektorlar, tabıǵatty qorǵaý polısııasy jumyldyrylady. Jyl basynan beri ruqsat etilmegen jerlerge qoqys tókken 120-dan astam júrgizýshi ákimshilik jaýapkershilikke tartyldy, - dedi medıa ortalyq tilshisine Astana qalasynyń IID JPQ basshysy Baqytjan Malybaev.
Aıyppuldan bólek, ákimshilik hattama toltyrǵan soń tártipti buzǵan júrgizýshilerdiń ózderi qoqysty qalalyq polıgonǵa aparyp tógý sharasy qoldanylady. Ol «Alash» tasjoly boıynda ornalasqan
Qala aýmaǵyn qurylys qaldyqtarymen lastaǵan, ruqsat etilmegen jerde qoqys úıý jáne baqylaý júrgizbeý boıynsha elordanyń merdiger jáne qurylys kompanııalaryna qatysty ákimshilik turǵyda jaza qoldanylady.
- Barlyq uıymdarda qoqys polıgondarymen kelisimshart bar. Biraq olar onda aparmaıdy, belgilenbegen jerge, jaqyn mańǵa shyǵaryp shashady. Sondyqtan osyndaǵy jol beretin qurylys kompanııalaryna qatysty jaza kúsheıtiledi. Biz úılerine qurylys jasaǵan soń qaldyqtardy ruqsat etilmegen jerge tóge salatyn jeke tulǵalarǵa qatysty jumystardy jalǵastyramyz. Bul is-sharalarda IID men JPQ barlyq kúshi jumyldyrylǵan, - deıdi B.Malybaev.
Budan bólek, Astana basshylyǵy tarapynan jańa ruqsat etilmegen jerlerdiń paıda bolýyna jol bermes úshin eskertý sharalary júrgizilýde. Elordanyń shet aýmaqtaryna erekshe kóńil bólinýde. Bul jerlerde qatty qaldyqtar úıindileri jańbyrdan keıingi sańyraýqulaqtardaı paıda bolýda. Máselen, qoqys tógýge arnalmaǵan jerlerde aýmaqqa júk kóligi kirip, qoqys tóge almaıtyndaıjyra qazady. Sonymen qatar JPQ-nyń ýchastkelik ınspektorlary elorda shetinde júretin aýyr kólik júrgizýshilerimen áńgimelesý, túsindirý júrgiziledi.
- Aıta ketý kerek, jyl ótken saıyn elordada zańsyz qoqys oryndary azaıyp keledi. Bul memlekettik organdardyń – ákimdik, JPQ, ýchastkelik qyzmettiń jumyla jasaǵan jumystarynyń arqasynda múmkin bolyp otyr.Alaıda nemquraıly qaraıtyn júrgizýshiler de bar. Olar ruqsat emes jerlerde tógýdi jalǵastyrýda. Biraq biz óz kúshimizben olardy jaýapkershilikke tartamyz jáne qatty qaldyqtardy arnaıy oryndarǵa shyǵarýdy mindetteımiz, - dedi «Saryarqa» aýdany IID JPQ-nyń tabıǵatty qorǵaý polısııasy bólimshesiniń basshysy Arman Syzdyqov.
Onyń sózinshe, bul atalǵan quqyq buzýshylyq úshin jeke tulǵalarǵa aıyppul 20 AEK salynady. Zańdy tulǵalar, eger bul orta jáne shaǵyn bıznes bolsa – 30 AEK kóleminde, al qaıtalap Zań buzǵan jaǵdaıda – 40 AEK kóleminde aıyppul tóleıdi.
Esterińizge salamyz, elordada 15 tamyzdan 15 qyrkúıek jergilikti polısııa qyzmeti, qalalyq prokýratýra, ekologııa departamenti, ákimshilik jáne krımınaldy polısııanyń qatysýymen ruqsat etilmegen jerlerdi joıý baǵytynda aılyq ótýde. Elorda tóńireginde ruqsat etilmegen jerlerde qoqys oryndaryn jasaǵan tulǵalardy anyqtaý jáne jolyn kesý boıynsha Zańǵa sáıkes jaýapkershilikke tartýǵa úlken mán beriledi.