Biri «Astanany» keshegi jeńilisi úshin jerden alyp jerge salyp jatsa, endi biri bul jeńilistiń kezdeısoqtyq ekenin aıtyp, qarsy topqa basý aıtyp jatyr. Osy oraıda biz sport jýrnalısteri, onyń ishinde fýtbol týraly jazyp, teleekrannan kommentator bolyp júrgen kásibı mamandardyń keshegi match týraly pikirin bilgen edik.
Ermuhamed Máýlen, kommentator
«Astana» komandasynyń keshe «Seltıkten» 0:5 esebimen jeńilgeni meniń oıymsha, jáı ǵana sátsizdik. Kez kelgen komandalarda mundaı iri eseppen jeńilis bolyp turady. «Astana» buǵan deıin ózderińiz kórgendeı Polshanyń Eýropada oınap júrgen eń myqty degen «Legııa» komandasyn op-ońaı utty. Menińshe, keshegi matchtan tragedııa jasaý durys emes. Eýropada iri eseppen utylyp júrgen komandalar jeterlik. Tipti «Barselonanyń» ózi bıyl fransııalyq «PSJ» komandasynan 0:4 esebimen utylǵany jankúıerlerdiń esinde.
Keshegi oıynnan keıin shotlandııalyq jankúıerlerdiń, jýrnalısterdiń ǵalamtorda jazyp jatqan aqparat pen saraptamalyq maqalalaryna senetin bolsaq, keshe «Seltıktiń» tek oıyny júrgenin, komandanyń joly bolǵanyn aıtyp, jazyp jatyr. «Astana» klýby endi Eýropa lıgasynda ózderine joǵary maqsat qoıý kerek. Jáne de 1/8 kezeńine shyǵýyna tilektespin.
Arshat Oraz, bloger
Eń aldymen 5:0 esebiniń oıynnyń naqty sýreti emes ekenin aıtqym keledi. Kez kelgen komandada fors-majorlyq jeńilister bolady, oıyn men nátıjeniń sáıkes kelmeıtin kezderi. Keshegi «Seltık» matchy solaı boldy dep oılaımyn. Iá, alań ıeleri álbette qonaqtarǵa qaraǵanda jaqsy oınady, qorǵanysta saýatty boldy. Tepken 4 soqqysynyń tórteýiniń gol bolýy jáne eki soqqynyń avtogolmen kirýi - olardyń sáttiligi. Árıne «fýtbolda sáttilik kúshtiler jaqta bolady» degen sóz de bar. «Seltık» kúshti bolǵany ras. Biraq bul «Astana» nashar boldy degen sóz emes. Múmkin uzaq joldyń áseri, múmkin Eýropa lıgasyna shyǵyp turýdy oılaýy áser etti me eken? Oıynshylardyń konsentrasııasy «Legııa» matchyndaǵydaı bolmady. Qarymta matchta 5 gol qaıtarý qıyn, biraq kórermender úshin oınaıdy. Eki jaqtyń da ádemi oıynymen naǵyz fýtbol meıramy bolady dep oılaımyn. «Astana» bıyl byltyrǵylarǵa qaraǵanda kúshti. Oıyny da eýropaı bola bastady. Buryn emosııa kóp bolatyn, sońǵy mınýt goldary solaı keletin. Qazir salqynqandylyq bar, senimdilik bar. Bul qasıeti Eýropa lıgasynda kómektesedi dep oılaımyn. Toptan shyǵa alatyn kúshke jáne quramǵa ıe.
Eseı Jeńisuly, sport jýrnalısi
«Seltık» - «Astana» kezdesýin bastan-aıaq kórdim. Ishimde bir ókinish qaldy. Shyndyǵynda, sportta esh zańdylyqqa baǵynbaıtyn, tek sol kúni ǵana bolatyn oqıǵalar bolyp turady. «Astana» 0:5 esebimen utylatyndaı jaman oınaǵan joq. Esepti teńestiretin, tipti bolmaǵanda qysqartatyn birneshe múmkindigi boldy. Tvýması, Postnıkov, Kabanangalardyń qaýip tóndirgen sátterinde bir soqqy qaqpadan tabylsa, oıyn múlde basqasha aıaqtalar edi. «Seltıktiń» tepkeni de, teppegeni de golǵa aınaldy. Fýtbolda mundaı mysal óte kóp. 2014 jylǵy álem chempıonatynyń jartylaı fınalynda asa sorly emes Brazılııa óz alańynda birinshi taımda Germanııadan 0:5 bolǵany esimizde. Árıne, «Astanany» Brazılııamen salystyrǵanymyzǵa kelispeıtinder de bolar, degenmen «Astana» keshe sol jambasymen turyp qalǵandaı kúı keshti. Áıtpese oń qaptaldan jasalǵan soqqynyń bári golǵa aınalatyny kimniń túsine kiripti? Sol soqqylar asa kúshti bolǵan da joq qoı. Tipti Postnıkov pen Shıtov aıaǵyn qoımasa, múlde qańǵyp bara jatqan doptar da qaqpa tórinen tabyldy.
Uzaq ýaqyt fýtbol kórip, jazyp, efırden júrgizip kele jatqan adam retinde «Astananyń» bul sátsizdigin salqynqandy qabyldadym. «Astana» jigersiz jeńilgen joq. Árıne, 0:5 degen aýyr esep, biraq ol elimizdegi jalǵyz komandanyń eýrokýboktardyń toptyq týrnırine úsh jyl qatarynan shyqqanynyń janynda túkke turmaıdy. Erteń «Astana» Eýropa lıgasynyń toptyq týrnırinde úlken erlik jasasynshy, búgin kóńili qalǵan jankúıer qaıta ýralaıdy. Fýtbol sonysymen de qyzyqty. Meni 0:5 esebi emes, qarymta kezdesýdegi qorǵanys jaıy mazalap otyr. Anıchıch jaraqatynan jazylyp úlgere me, Malyıǵa bapker senim arta ma? Logvınenko onsyz da joq. Sonda Postnıkov pen Shomkony keı oıyndaǵydaı ortaǵa qaıta jyljytýǵa týra kelmeı me? Mine, másele osy. «Astanaǵa» 5 goldyń qarymtasyn qaıtarý qıyn bolar. Degenmen jastyqty ala jyǵylýǵa tyrysý kerek.
Nurǵazy Sasaev, sportsffa.kz saıtynyń qazaq tili bólimi redaktory:
– «Astananyń» Glazgoda «Seltıkten» oısyraı utylýy zańdylyq pa, joq álde kezdeısoq nátıje me? Oǵan tek «Astana» fýtbolshylarynyń ózderi «jaýap» bere alady. Sózben emes, ispen, ıaǵnı jasyl alańdaǵy oıyn órnekterimen. 22 tamyz kúni ótetin qarymta matchta iri eseppen utyp, ese qaıtarý kerek. 5:0 esebimen ústem túspese de, kemi úsh dop aıyrmasymen utsa, onda qarymyn qaıtardy dep, esepteýge bolar edi...
«Seltık» – osydan 130 jyldaı ýaqyt buryn (1887 jyly 6 qarashada) qurylǵan shejiresi mol komanda. Al «Astana» 2009 jyly ǵana quryldy. Ras, sońǵy úsh jylda Chempıondar lıgasy men Eýropa lıgasynyń toptyq kezeńine shyǵyp otyr. О́z jerimizdegi jasandy alańda Eýropanyń azýly klýbtarynan utylmaı keledi. Jankúıerler, tipti klýbtyń ózi de osy jetistikterge masattana bastaǵandaı.
Negizi, alǵashqy jetistikterge sonsha erkinsýdiń qajeti joq edi. Biz áli «Seltık» sekildi shejiresi mol komandalardan oısyraı utylǵanymyzǵa qýystanatyn dárejege jetken joqpyz. Kerisinshe, aptyǵymyzdy basyp, sabamyzǵa túsirip, tereń oıǵa shomýǵa májbúr etkeni durys bolǵan da sııaqty. О́ıtkeni «Astana» joǵaryda atalǵan tyrnaqaldy jetistikterine Stanımır Stoılovtyń kásibı biliktiliginiń arqasynda qol jetkize bastaǵan. Alaıda tek qana jankeshtilik pen qaısarlyqtyń, talpynys pen umtylystyń, sondaı-aq bapkerdiń taktıkalyq aıla-tásilderiniń arqasynda tym alysqa bara almaımyz. Ol úshin jalpy qazaq fýtbolynyń deńgeıin kóterý kerek.
«Seltıkti» osyndaı dárejege kótergen – «atajaýy» «Reındjers». Endeshe, «Astanaǵa» da «Qaırattyń» Eýropada oıqastap júrgeni tıimdi.