1976 jyldan bastap Birikken Ulttar Uıymyna múshelikke ótken. Sońǵy jyldary Qazaqstan men Samoa memleketi arasynda ekijaqty qarym-qatynas nyǵaıyp keledi. Atap aıtar bolsaq, 2013 jyldyń 7 aqpanynda Nıý-Iork qalasynda memleketaralyq birlesken kommıýnıkege qol qoıylyp, dıplomatııalyq qatynas ornaǵan bolatyn. Sonyń nátıjesinde búgin samoalyqtar Arqa tórinde keń kósilip, kórikti kórmeniń sánin keltirgen qurmetti qonaq retinde qabyldandy.
Resmı sharanyń ashylý saltanaty Qazaqstan jáne Samoa elderiniń memlekettik gımnder alma-kezek shyrqalýmen bastalyp, kórmeni uıymdastyrýshy el retinde alǵashqy betashar pikir bildirý mártebesi Eńbek jáne halyqty áleýmettik qorǵaý mınıstrliginiń jaýapty hatshysy Aıda Qurmanǵalıevaǵa buıyrdy.
Aıda Dadenqyzy áýeli osynda jınalǵan barsha jurtty EKSPO-2017 halyqaralyq kórmesi aıasynda ótkizilip otyrǵan Samoa memleketiniń ulttyq kúni merekesimen quttyqtap, aıshyqty kórme burynǵy keńestik elder aýmaǵynda Qazaqstannyń astanasynda alǵash ret ótkizilip otyrǵanyn, bul biz úshin tek qurmet qana emes, jaýapty mıssııa bolyp tabylatynyn jetkizdi.
«Iаǵnı, mamandandyrylǵan kórmeniń urany «Bolashaqtyń energııasy» atalyp, balamaly qýat kózderin qoldanýdy aýqymdy túrde keńeıtýge negiz bolatyn ekonomıkalyq damýdyń jahandyq tuǵyryna tolyqqandy saı keledi. Bizdiń kórme dúnıege degen zamanaýı kózqarastyń, taza jahandyq energetıkanyń damý ıdeıalaryn jetildirýdiń jańa paraǵyn ashatynyna senimdimin. Ár eldiń energetıka salasyndaǵy noý-haý tanystyrylymynan bólek kórme aıasynda iri halyqaralyq is-sharalar uıymdastyrylýda. Qazaqstannyń elordasy tórtkúl dúnıeniń túrli ulttyq kúnderine kýá bolyp otyr. Kún saıyn kórme aýmaǵynda qatysýshy memleketterdiń ulttyq kúnderi, halyqaralyq uıymdardyń taqyryptyq jıyndary jáne san túrli mádenı oıyn-saýyq hám sporttyq is-sharalar ótkizilýde. Sonyń biri búgingi Samoa memleketiniń ulttyq pavılonynyń ashylýy. Ulttyq kúnder kórmege qatysýshy memleketterdiń arasyndaǵy qarym-qatynasty nyǵaıtýǵa járdemdesetin halyqaralyq mádenıet almasý quraly bolyp tabylady ári qatysýshylarǵa ulttyq mádenıettiń, ómir saltynyń úzdik úlgilerin pash etýge múmkindik beredi. Biz óz kezegimizde Qazaqstan ekonomıkanyń túrli salalarynda, sonyń ishinde eńbek jáne halyqty áleýmettik qorǵaý salasyndaǵy halyqaralyq tájirıbe men álemniń úzdik úrdisterin zerdeleýge múddeli ekenin málimdeımin. Samoa eliniń mundaǵy ókilderin merekesimen quttyqtaımyn», dedi Eńbek jáne halyqty áleýmettik qorǵaý mınıstrliginiń jaýapty hatshysy.
Odan keıin ekinshi taraptyń ókili retinde sóz alǵan Samoa táýelsiz memleketi qarjy mınıstriniń orynbasary Mýlıpola Leıataýa Lakı Mýlıpola myrza atalmysh kórmege óz eliniń jeke-dara memleket retinde qatysyp otyrýy zor mártebe ekenin maqtanyshpen jetkizip, tolqyǵan kók teńizdiń tereń túkpirinde typ-tynysh jatqan samoalyqtar atynan barlyq qazaqstandyqtarǵa jáne Elbasyna, Úkimet múshelerine alǵysymdy bildiremin. Jáne álemdik saıası qaýymdastyqtar tarapynan Qazaqstanǵa qarata aıtylyp jatqan madaq-maqtaýlar men resmı moıyndaýlarǵa tolyq qosylamyn. Qazirgi tańda kúlli álem halqy tabıǵı resýrstardyń jetispeýshiligine ushyraı bastady. Keıbir memleketter qazirdiń ózinde tyǵyryqqa tirelý ústinde. Adamdardyń energııany shekten tys baqylaýsyz paıdalanýynan jahandyq daǵdarys órship kele jatyr. Eger de energııa máselesin árkez rettep otyrmasa, qorshaǵan ortanyń jónsiz lastanýy, klımattyq ózgeristerdiń jedel qubylmaly kúıge ushyraýy, ekologııalyq arylmas qatelikterdiń oryn alýyna áser eteri sózsiz, degendi aıtty.
Sonymen qatar, Mýlıpola myrza: «Aldaǵy ýaqytta álem turǵyndarynyń jasyl energııaǵa degen suranysy artady. Biz sııaqty Tynyq muhıty aımaǵy elderi jasyl jáne jańǵyrmaly energııa kózderin paıdalanýdy qoldaımyz. Energııaǵa degen suranys pen ony óndirý isin rettemese kúızelistiń paıda bolý yqtımaldyǵy artady. Barlyǵymyz bir jeńnen qol, bir jaǵadan bas shyǵara otyryp, energııa kózderine qatysty máseleni sheshý barysynda ornyqty jáne berik áriptestik qurýdy qolǵa alǵanymyz abzal. Sondaı-aq, barynsha qorshaǵan ortanyń tazalyǵyn saqtaý, jasyl energııa kózderin durys paıdalanýdy yntalandyrý kerek», dep sózin tujyrymdady.
Shara sońynda jınalǵan kópshilik samoalyqtardyń ulttyq bı ónerin tamashalap, jyly raıly ólkede óngen ulttyń ózindik sıpatyna qanyqty.
Beken QAIRATULY,
«Egemen Qazaqstan»
Sýretterdi túsirgen,
Orynbaı BALMURAT,
«Egemen Qazaqstan»