Keshe Parlament Senatynda palata Tóraǵasynyń orynbasarlary Muhambet Kópeev pen Aleksandr Sýdınniń qatysýymen «2012-2014 jyldarǵa arnalǵan respýblıkalyq bıýdjet týraly» zań jobasynyń tanystyrylymy boldy. Otyrysqa Qarjy jáne bıýdjet komıtetiniń tóraǵasy Qaırat Ishanov tóraǵalyq etti, dep habarlady osy palatanyń baspasóz qyzmeti.
Tanystyrylym barysynda Qarjy mınıstri B.Jámishev, Ekonomıkalyq damý jáne saýda mınıstriniń orynbasary M.Qusaıynov, Ulttyq Bank tóraǵasynyń orynbasary B.Tájiıaqov sóz sóılep, bıýdjet qarjysyn tıimdi jumsaý, jergilikti ınfraqurylymdy nyǵaıtý, densaýlyq saqtaý jáne bilim berý nysandary qurylysyn salý jónindegi depýtattardyń saýaldaryna jaýap berdi.
Bıýdjet qarjysynyń kórsetkishteri munaı óndirýden basqa salalardaǵy tapshylyqty birte-birte tómendetýge jáne osy bıýdjettiń tapshylyǵyn azaıtýǵa múmkindik beredi. Bıýdjet kórsetkishteriniń aıasynda respýblıkalyq qarjy áleýmettik salany nyǵaıtýǵa, aýyl sharýashylyǵyn, týrızm men sportty, baılanysty damytýǵa, ındýstrııalyq-ınnovasııalyq, eńbekke ornalastyrý, turǵyn úı qurylysy, turǵyn úı-kommýnaldyq sharýashylyǵyn jańǵyrtý baǵdarlamalaryn iske asyrýǵa baǵyttalady.
«2012-2014 jyldarǵa arnalǵan respýblıkalyq bıýdjet týraly» zań jobasy endi jumys tobynda talqylanatyn bolady.